काठमाडौं । इटालियन क्लब इन्टर मिलानले इंग्लिस विंगर जेड स्पेन्सलाई टोटनहमबाट अनुबन्ध गरेको छ।

इन्टर मिलानले शनिबार स्पेन्ससँग सन् २०३१ सम्मको सम्झौता भएको जनाएको हो। क्लबले सम्झौताको रकम सार्वजनिक नगरे पनि इंग्लिस सञ्चारमाध्यमहरूले स्पेन्सलाई करिब ३० मिलियन पाउण्डमा भित्र्याइएको जनाएका छन्।

इन्टरले विज्ञप्तिमार्फत स्पेन्ससँग दीर्घकालीन सम्झौता भएको पुष्टि गरेको छ।

स्पेन्स चार वर्षअघि टोटनहममा आबद्ध भएका थिए। उनले टोटनहमका लागि ८५ खेल खेलेका छन्। क्लबमा रहँदा उनी स्टेड रेनाइस, लिड्स युनाइटेड र जेनोआलगायतका क्लबमा लोनमा समेत पुगेका थिए।

इंग्ल्यान्डको राष्ट्रिय टोलीका सदस्यसमेत रहेका स्पेन्स फिफा विश्वकप २०२६ को टोलीमा पनि समावेश भएका थिए। इन्टर मिलानले उनलाई आगामी सिजनका लागि महत्वपूर्ण खेलाडीका रूपमा अनुबन्ध गरेको हो।

Originally published on abcnews.com.np.