धनकुटा साउन ३१ । कोसी लोकमार्गअन्तर्गत धनकुटाको साँगुरीगढी गाउँपालिका–६ स्थित चारखोले गोलाइमा यात्रुवाहक बस दुर्घटना हुँदा तीन जना घाइते भएका छन्।

धरानबाट तेह्रथुमतर्फ जाँदै गरेको को १ ख ५१०५ नम्बरको बस आइतबार बिहान अनियन्त्रित भई सडकछेउमा पल्टिँदा दुर्घटना भएको हो।

जिल्ला प्रहरी कार्यालय धनकुटाका प्रहरी प्रवक्ता तथा प्रहरी नायब उपरीक्षक (डीएसपी) हेमन्त भण्डारी क्षेत्रीका अनुसार दुर्घटनामा तेह्रथुमको छथर गाउँपालिका–१ की ११ वर्षीया नुमा लिम्बू, छथर गाउँपालिका–४ का ६९ वर्षीय कविराज थापा र सोही ठाउँकी ५६ वर्षीया शुकमाया लिम्बू घाइते भएका छन्।

इलाका प्रहरी कार्यालय भेडेटारबाट खटिएको प्रहरी टोलीले घाइतेहरूको उद्धार गरी उपचारका लागि बीपी कोइराला स्वास्थ्य विज्ञान प्रतिष्ठान, धरानपठाएको प्रहरीले जनाएको छ।

प्रहरीका अनुसार घाइते तीनै जनाको अवस्था सामान्य रहेको छ। बस अनियन्त्रित हुनुको कारणबारे भने अनुसन्धान भइरहेको जिल्ला प्रहरी कार्यालय धनकुटाले जनाएको छ।

Originally published on abcnews.com.np.