तनहुँ  । अविरल वर्षाका कारण तनहुँको भिमाद नगरपालिकामा तीनतले कच्ची घर भत्किएर पूर्ण रूपमा क्षतिग्रस्त भएको छ।

भिमाद नगरपालिका–३ सुनाकोटस्थित ४६ वर्षीय विष्णुकुमार श्रेष्ठको ढुङ्गा–माटोले बनेको तथा ढुङ्गाले छाएको घरको पछाडिपट्टिको गारो शुक्रबार राति भत्किएको हो। गारो भत्किएपछि घर पूर्ण रूपमा क्षतिग्रस्त भई बसोबास गर्न नमिल्ने अवस्थामा पुगेको जिल्ला प्रहरी कार्यालय तनहुँले जनाएको छ।

प्रहरीका अनुसार शुक्रबार राति करिब ९ बजे लगातारको वर्षाका कारण घरको पछाडिको गारो भत्किएको थियो। गारो भत्किएसँगै घरको संरचनामा ठूलो क्षति पुगेको र तत्काल बस्न जोखिमपूर्ण रहेको प्रहरीले जनाएको छ।

घटनाको जानकारी पाएलगत्तै इलाका प्रहरी कार्यालय भिमादबाट प्रहरी वरिष्ठ नायब निरीक्षक लोकबहादुर क्षेत्रीको कमान्डमा पाँच जनाको प्रहरी टोली घटनास्थलमा पुगेको थियो।

प्रहरी नायब उपरीक्षक द्वारिकाप्रसाद घिमिरेका अनुसार घरमा क्षति भए पनि समयमै सतर्कता अपनाइएकाले घटनामा कुनै मानवीय क्षति भएको छैन। चौपायासमेत सुरक्षित रहेको प्रहरीले जनाएको छ।

“घरको पछाडिको गारो भत्किँदा घर पूर्ण रूपमा क्षति भएको छ। अहिले बसोबास गर्न योग्य छैन,” प्रहरी नायब उपरीक्षक घिमिरेले भने।

लगातारको वर्षाका कारण ग्रामीण क्षेत्रमा रहेका कच्ची तथा पुराना घरहरू जोखिममा पर्न थालेपछि स्थानीय तह र सुरक्षा निकायले सतर्कता अपनाउन आग्रह गरेका छन्। श्रेष्ठको परिवारलाई तत्काल राहत तथा सुरक्षित बसोबासको व्यवस्था गर्न आवश्यक समन्वय भइरहेको प्रहरीले जनाएको छ।

Originally published on abcnews.com.np.