काठमाडौं । नेकपा (एमाले)का अध्यक्ष केपी शर्मा ओलीले पार्टीबाट पर्याप्त अवसर पाएका नेताहरू नै अहिले असन्तुष्ट बनेको टिप्पणी गरेका छन्।

आइतबार झापाको बिर्तामोडमा आयोजित ‘मिसन पार्टी जागरण अभियान–२०८३’ को शुभारम्भ गर्दै ओलीले पार्टीभित्रका असन्तुष्टि विधान र संस्थागत प्रक्रियामार्फत राख्नुपर्ने बताए।

“नपाउने मान्छे खास असन्तुष्ट छैनन्। पाएका असन्तुष्ट छन्। खाएका, लगाएका असन्तुष्ट छन्। जसले पार्टीबाट पर्याप्त अवसर लिए, तिनै असन्तुष्ट छन्,” ओलीले भने।

उनले पार्टीबाट अवसर पाएका केही व्यक्तिले आफूले निरन्तर अवसर पाइरहनुपर्ने अपेक्षा राखेको र अरूले अवसर पाउने अवस्था आएपछि असन्तुष्ट हुने गरेको आरोप लगाए।

ओलीले यस्तो प्रवृत्तिलाई उदाहरण दिँदै भने, “किर्नाले पनि टन्न खाएर अघाएपछि भैँसीको जिउबाट भुइँमा झर्छ। एमालेलाई पनि त्यस्तै भैँसी बनाउन खोजेका छन्।”

तर एमाले निरन्तर नयाँ कार्यकर्ता उत्पादन गर्दै अघि बढ्ने पार्टी भएको उनले बताए। “एमाले त्यस्तो भैँसी होइन। एमाले त लगातार कार्यकर्ता उत्पादन गरेर अघि बढ्ने पार्टी हो,” उनले भने।

उनका अनुसार पार्टीमा सबै कार्यकर्ताले सधैँ अवसर पाउने अवस्था हुँदैन। अवसर नपाएका कतिपय कार्यकर्ताले पनि पार्टीप्रति निरन्तर योगदान दिइरहेको तर अवसर पाएका केही व्यक्तिले भने पछिल्लो निर्वाचनमा समेत पार्टीलाई साथ नदिएको ओलीको आरोप थियो।

“केही नपाएकाले यसपटक पनि भोट हाले। केही पाएकाले यसपटक भोट हालेनन्। केही मान्छे त्यस्ता निस्किए, जो पाइरहन चाहन्छन्। अर्काले पाउने भो भने बुर्लुक उफ्रन्छन्,” उनले भने।

ओलीले सामाजिक सञ्जालमा स्टाटस लेखेर पार्टी अध्यक्ष हटाउने तथा बाहिर हस्ताक्षर अभियान सञ्चालन गर्ने गतिविधिप्रति पनि आपत्ति जनाए। यस्ता गतिविधि पार्टीको विधान र संस्थागत प्रक्रियाविपरीत भएको उनको भनाइ थियो।

“सामाजिक सञ्जालमा स्टाटस लेखेर अध्यक्ष हटाउने, बाहिर हस्ताक्षर क्याम्पियन गरेर अध्यक्ष हटाउने। यस्तो हुन्थ्यो र? पार्टीमा त्यो शैली हुन्छ?” ओलीले प्रश्न गरे।

उनले यस्ता गतिविधिलाई अराजकताको संज्ञा दिँदै पार्टीको नेतृत्वप्रति असन्तुष्टि भए संस्थागत रूपमा आफ्नो धारणा राख्नुपर्ने बताए। पार्टी र अध्यक्ष मन नपरे छाड्न सकिने, तर अराजक गतिविधि गर्न नहुने उनको भनाइ थियो।

“कसैलाई मन परेन भनेर बिहे गरेर श्रीमती छोडेका छन्। अध्यक्ष छोड्न किन पाइँदैन? मन परेन भने कसको के लाग्छ,” ओलीले भने।

पार्टीभित्र नेतृत्वले पनि अनुशासन र मर्यादा कायम राख्नुपर्नेमा ओलीले जोड दिए। माथिल्लो तहका नेताले कसैलाई हेप्ने, होच्याउने, अपमान गर्ने वा हप्काउने व्यवहार गर्न नहुने उनले बताए।

“कसैले कसैलाई हेप्ने, होच्याउने, अपमान गर्ने, हप्काउन पाइन्छ?” ओलीले प्रश्न गरे।

आफूले राजनीतिक जीवनमा कसैलाई हप्काउने व्यवहार नगरेको दाबी गर्दै उनले आफूले हप्काएर कसैलाई बेहोस बनाएको भन्ने चर्चा पनि गलत भएको बताए।

ओलीको पछिल्लो अभिव्यक्ति एमालेभित्र नेतृत्व, पुनर्गठन र संगठनात्मक सुधारका विषयमा बहस चलिरहेका बेला आएको हो। पार्टीभित्र असन्तुष्ट समूहले नेतृत्व तथा कार्यशैलीमाथि प्रश्न उठाइरहेका बेला अध्यक्ष ओलीले भने संस्थागत प्रक्रियाबाहिरबाट नेतृत्व परिवर्तनको प्रयास स्वीकार्य नहुने स्पष्ट संकेत दिएका छन्।

Originally published on abcnews.com.np.