काठमाडौँ । देशका अधिकांश भूभागमा मनसुन सक्रिय रहेकाले आज पनि वर्षाको सम्भावना रहेको छ। जल तथा मौसम विज्ञान विभागका अनुसार विशेषगरी लुम्बिनी, गण्डकी, कर्णाली र सुदूरपश्चिम प्रदेशका केही क्षेत्रमा भारी वर्षा हुनसक्ने देखिएको छ।

विभागले दिउँसो लुम्बिनी प्रदेशको तराई भूभागका एक–दुई स्थानमा धेरै भारी वर्षा हुनसक्ने पूर्वानुमान गरेको छ। त्यस्तै गण्डकी, लुम्बिनी, कर्णाली र सुदूरपश्चिम प्रदेशका पहाडी भूभाग तथा लुम्बिनी र सुदूरपश्चिमका तराई क्षेत्रका एक–दुई स्थानमा भारी वर्षाको सम्भावना रहेको छ।

भारी वर्षा हुने क्षेत्रमा अचानक बाढी, पहिरो तथा सडक अवरोधको जोखिम बढ्न सक्ने भएकाले विशेष सावधानी अपनाउनुपर्ने देखिएको छ।

विभागका अनुसार आज दिउँसो देशभर मौसम सामान्यतया बदली रहनेछ।

गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका धेरै स्थानमा वर्षाको सम्भावना छ। कोसी र वाग्मती प्रदेशका हिमाली तथा पहाडी क्षेत्रमा पनि केही स्थानमा मध्यमसम्म वर्षा हुनसक्ने विभागले जनाएको छ।

यस्तै गण्डकी, लुम्बिनी र सुदूरपश्चिम प्रदेशका तराई भूभागका धेरै स्थानमा तथा मधेस, कोसी र वाग्मती प्रदेशका तराई भूभागका केही स्थानमा मेघगर्जन र चट्याङसहित मध्यम वर्षा हुनसक्ने पूर्वानुमान गरिएको छ।

रातिसम्म पनि वर्षाको सम्भावना

रातिसम्म देशभर सामान्यतया बदली रहने विभागले जनाएको छ।

हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा तथा हिमपात हुनसक्ने सम्भावना छ।

कोसी, वाग्मती, गण्डकी, लुम्बिनी र सुदूरपश्चिम प्रदेशका तराई क्षेत्रका केही स्थानमा तथा मधेस प्रदेशको तराई भूभागका थोरै स्थानमा पनि मध्यमसम्म वर्षा हुनसक्ने विभागको अनुमान छ।

हाल नेपालमा मनसुनी वायुको प्रभाव रहेको छ। विभागका अनुसार मनसुनको न्यूनचापीय रेखा पूर्वतर्फ सरदर स्थान आसपास रहे पनि पश्चिमतर्फ भने सरदर स्थानभन्दा उत्तरतर्फ, नेपालनजिक रहेको छ।

यस अवस्थाका कारण विशेषगरी पश्चिम नेपालका केही क्षेत्रमा वर्षाको गतिविधि बढ्नसक्ने देखिएको छ।

यात्रामा विशेष सावधानी आवश्यक

पछिल्ला दिनमा लगातार वर्षाका कारण देशका विभिन्न सडकमा बाढी, पहिरो र सडक कटानका घटना भइरहेका छन्। यस्तो अवस्थामा भारी वर्षाको पूर्वानुमान भएका क्षेत्रमा सडक तथा राजमार्गको अवस्था बुझेर मात्र यात्रा गर्न आवश्यक देखिन्छ।

विशेषगरी पहाडी क्षेत्रमा पहिरोको जोखिम, नदी तथा खोलामा आकस्मिक बहाव र तराई क्षेत्रमा डुबानको सम्भावना रहने भएकाले स्थानीय प्रशासन तथा सुरक्षा निकायको सूचना पालना गर्नुपर्ने हुन्छ।

लुम्बिनीको तराईमा धेरै भारी वर्षाको सम्भावना रहेकाले आज पश्चिम तथा मध्य नेपालका जोखिमयुक्त क्षेत्रमा थप सतर्कता आवश्यक देखिएको छ।

Originally published on abcnews.com.np.