काठमाडौं । विराटनगरस्थित जिल्ला कारागार मोरङभित्र लागूऔषध पुग्ने गरेको सूचनापछि प्रहरीले सोमबार बिहान सर्च अपरेशन सञ्चालन गर्ने प्रयास गरे पनि कैदीबन्दीको विरोधका कारण अभियान रोकिएको छ।

प्रहरीले सर्च अपरेशन सुरु गरेलगत्तै कैदीबन्दीले नाराबाजी गरेपछि अवस्था तनावपूर्ण बनेको थियो। सम्भावित घटना रोक्न कारागारबाहिर ठूलो संख्यामा सशस्त्र प्रहरी परिचालन गरिएको थियो।

जिल्ला प्रशासन कार्यालय मोरङका प्रमुख जिल्ला अधिकारी युवराज कट्टेलका अनुसार कारागारभित्रबाट आक्रमण तथा आत्मदाह गर्ने धम्की आएपछि सर्च अभियान रोकिएको हो।

उनका अनुसार आइतबार कारागारमा विपश्यनाको योजना बनाउन प्रवेश गर्न खोज्दा पनि कैदीबन्दीले रोक लगाएका थिए। शंकास्पद गतिविधि हुन सक्ने अनुमानपछि सोमबार सर्च अभियान सञ्चालन गर्न खोजिएको भए पनि भित्रको अवस्था उग्र हुने देखिएपछि अभियान रोकिएको हो।

चौकिदार नियुक्तिको विवाद

आइतबारदेखि नै मोरङ कारागारको ‘बी ब्लक’ का कैदीबन्दीले विरोध गर्दै आएका थिए। ‘बी ब्लक’ का चौकिदार चञ्चल शर्मासहित केही कैदीलाई अन्य जिल्लाको कारागारमा पठाएर नयाँ चौकिदार नियुक्त गर्ने तयारी भएको भन्दै उनीहरूले कारागार प्रशासनविरुद्ध नाराबाजी गरेका हुन्।

कारागार स्रोतका अनुसार ‘ए ब्लक’ का चौकिदार राकेश यादव पक्षले ‘बी ब्लक’ मा पनि आफू निकट व्यक्तिलाई चौकिदार बनाउन चलखेल गरेको आरोप छ। दुई ब्लकका चौकिदारबीचको विवादका कारण कैदीबन्दीसमेत विभाजित भएको बताइएको छ।

चौकिदार नियुक्तिमा आर्थिक चलखेलको आरोप

लामो समयदेखि कारागारमा रहेका र असल चालचलन भएका कैदीलाई प्रमुख जिल्ला अधिकारी नेतृत्वको समितिले सिफारिस गर्ने र विभागले चौकिदार नियुक्त गर्ने कानुनी व्यवस्था रहेको बताइएको छ।

तर, कारागारभित्र चौकिदार बन्ने विषयमा आर्थिक चलखेल तथा अस्वस्थ प्रतिस्पर्धा हुने गरेको स्रोतको दाबी छ। मोरङ कारागारका ‘ए ब्लक’ का चौकिदार राकेश यादवसमेत कर्तव्य ज्यान मुद्दामा दोषी ठहर भई जन्मकैदको सजाय भोगिरहेका व्यक्ति हुन्।

चौकिदार नियुक्ति प्रक्रिया स्थगित

सरकारले पछिल्लो समय कारागारका चौकिदार, नाइके र भाइ नाइकेको नियुक्ति प्रक्रियासमेत स्थगित गरेको छ।

प्रतिनिधिसभाअन्तर्गतको कानुन, न्याय तथा मानव अधिकार समितिको बैठकमा गृहमन्त्री सुधन गुरुङले चौकिदार, नाइके र भाइ नाइकेको नियुक्ति प्रक्रिया स्थगित गरिएको जानकारी दिएका थिए। कारागारभित्र हुने आर्थिक लेनदेन तथा नियुक्तिमा देखिएको अपारदर्शिता अन्त्य गर्न यस्तो निर्णय गरिएको बताइएको छ।

कारागार नियमावली २०८३ अनुसार आन्तरिक व्यवस्थापनका लागि प्रत्येक ब्लकमा एक जना चौकिदार, २५ जना कैदी बराबर एक जना नाइके र १० जना बराबर एक जना सहनाइके नियुक्त गर्ने व्यवस्था रहेको छ।

Originally published on abcnews.com.np.