काठमाडौं । प्रधानमन्त्री बालेन्द्र शाह र गण्डकी प्रदेशका मुख्यमन्त्री सुरेन्द्रराज पाण्डेबीच सोमबार प्रधानमन्त्री कार्यालयमा भेटवार्ता भएको छ। भेटमा गण्डकी प्रदेशको समग्र विकास, पूर्वाधार तथा संघ–प्रदेश समन्वयका विषयमा छलफल भएको मुख्यमन्त्री कार्यालयले जनाएको छ।

मुख्यमन्त्री पाण्डेले भारतसँग जोडिएको त्रिवेणी नाका तथा चीनसँग जोडिएका मुस्ताङको कोरोला र गोरखाको रुईला नाकामा पूर्वाधार विकास र सीमा व्यवस्थापनका विषयमा प्रधानमन्त्री शाहलाई जानकारी गराएका थिए।

नवलपुरको विनयी त्रिवेणी गाउँपालिकाअन्तर्गत दुम्किबासदेखि त्रिवेणीसम्मको हुलाकी सडकको चितवन राष्ट्रिय निकुञ्ज क्षेत्रमा पर्ने करिब ८ किलोमिटर खण्ड निर्माणका लागि सहजीकरण गरिदिन पनि उनले आग्रह गरे।

आर्थिक वर्ष २०८२/८३ मा संघबाट बजेट नपाउँदा संघीय सशर्त अनुदानअन्तर्गत सञ्चालित १९० खानेपानी आयोजना र सडकतर्फ हस्तान्तरण भएका चार आयोजना प्रभावित भएको विषयमा समेत छलफल भएको थियो। फेवाताल अतिक्रमित संरचना हटाउने तथा मुआब्जा वितरणका योजना अधुरो रहेको विषय पनि मुख्यमन्त्री पाण्डेले उठाएका थिए।

भेटमा गण्डकीका प्रस्तावित औद्योगिक क्षेत्रका लागि आवश्यक जग्गा प्राप्ति तथा मनाङ, मुस्ताङ र गोरखाको उत्तरी क्षेत्रमा जग्गा नापी तथा दर्ताको व्यवस्था मिलाउने विषयमा समेत छलफल भयो।

त्यस्तै, अन्नपूर्ण र मनास्लु संरक्षण क्षेत्रअन्तर्गतका वन क्षेत्र प्रदेश सरकार मातहत ल्याउने तथा संरक्षण क्षेत्रभित्रका नदीजन्य पदार्थ संकलन, व्यवस्थापन र उपयोगको अधिकार स्थानीय तहलाई दिने विषय पनि उठाइएको थियो।

राष्ट्रिय निकुञ्ज तथा वन्यजन्तु संरक्षण ऐन, २०२९ र संरक्षण क्षेत्र व्यवस्थापन नियमावली, २०५३ संशोधन, गण्डकी प्रदेश घरेलु मदिरा ऐन, २०८२ कार्यान्वयन तथा नियमनसहित गाँजा खेतीको उपयोग र व्यवस्थापनका विषयमा पनि छलफल भएको मुख्यमन्त्री कार्यालयले जनाएको छ।

प्रदेश आमसञ्चार ऐन, २०८० अनुसार अनलाइन सञ्चारमाध्यमको दर्ता तथा नवीकरण र आमसञ्चार माध्यमको इजाजतपत्र नवीकरण प्रदेश सरकारबाटै हुनेगरी नीतिगत व्यवस्था मिलाउने विषयमा समेत छलफल भएको थियो।

मुख्यमन्त्री पाण्डेले उठाएका विषयमा प्रधानमन्त्री शाहले सकारात्मक प्रतिक्रिया जनाउँदै कानुन निर्माण आवश्यक पर्ने विषयमा कानुनी सहजीकरण तथा संघीय सरकारबाट नीतिगत निर्णय आवश्यक पर्ने विषयमा समन्वय गर्ने प्रतिबद्धता व्यक्त गरेको बताइएको छ।

Originally published on abcnews.com.np.