काठमाडौं । नेपाली कांग्रेसका सभापति गगन थापाले प्रधानमन्त्री बालेन शाहलाई शासकीय अराजकता अन्त्य गर्न आग्रह गरेका छन्।

सानेपामा जारी कांग्रेस केन्द्रीय समिति बैठकलाई सम्बोधन गर्दै थापाले सरकारले गरेका राम्रा कामको समर्थन गर्ने, तर गलत काम हुँदा सचेत गराउन नछाड्ने बताए।

आफ्नो घरअगाडि तेर्साइएको गाडीको चालक प्रहरी नै भएको दाबी गर्दै थापाले राज्यका कुनै पनि निकायलाई आफूखुसी प्रयोग गर्ने प्रवृत्ति गलत भएको बताए।

‘राज्यको एउटा संस्थालाई मैले चाहेको बेलामा गर्छु भनेर मन्त्री वा प्रधानमन्त्री कार्यालयमा बसेकाले सोचेका छन् भने त्यो गलत हो। शासकीय अराजकता अन्त्य गर्नैपर्छ,’ उनले भने।

थापाले सरकारले केही राम्रो काम गर्ने प्रयास गरिरहेको भन्दै त्यसलाई सकारात्मक रूपमा लिनुपर्ने बताए। तर सरकारबाट गलत काम भए त्यसप्रति सचेत गराउने र खबरदारी गर्ने काम कांग्रेसले निरन्तर गरिरहने उनको भनाइ थियो।

उनले राष्ट्रिय स्वतन्त्र पार्टी (रास्वपा) नेतृत्वको सरकारले निर्वाध रूपमा पाँच वर्ष काम गर्न पाउनुपर्ने धारणा पनि राखे।

Originally published on abcnews.com.np.