हेटौंडा, २ भदौ । मकवानपुरको भीमफेदी गाउँपालिका–६ जुरिखेतमा भएको जिप दुर्घटनामा घाइते भएका ६ जनाकै पहिचान खुलेको छ ।

दुर्घटनामा उच्च अदालत जनकपुरको अस्थायी इजलास वीरगञ्जका मुख्य न्यायाधीश गोकर्ण डाँगीसहित उहाँका सहकर्मी तथा परिवारका सदस्य घाइते भएका हुन् ।

घाइते हुनेमा दाङको तुलसीपुर उपमहानगरपालिका–९ का ५७ वर्षीय मुख्य न्यायाधीश डाँगी, रजिष्ट्रार ५७ वर्षीय तारादत्त बडू, उहाँकी श्रीमती ४९ वर्षीया लक्ष्मी बडू, छोरा २५ वर्षीय रितेन्द्र बडू र दिदी ३१ वर्षीया रिता बडू रहेका छन् ।

त्यस्तै, दाङको राप्ती नगरपालिका–८ का करिब ३२ वर्षीय जिप चालक छुनिलाल चौधरी पनि दुर्घटनामा घाइते भएका छन् ।

मंगलबार बिहान काठमाडौंबाट वीरगञ्जतर्फ आउँदै गरेको प्रदेश ३–०१–००२ झ ५१८३ नम्बरको स्कारपियो भीमफेदी–६ जुरिखेतमा सडकबाट करिब ५०–६० मिटर तल खोल्सामा खसेर दुर्घटना भएको हो ।

दुर्घटनापछि घाइते सबैलाई उद्धार गरी उपचारका लागि भीमफेदी अस्पताल लगिएको थियो ।

प्रहरीका अनुसार चालक चौधरी र रजिष्ट्रार बडूलाई थप उपचारका लागि हेटौंडा अस्पताल पठाइएको छ । अन्य चार जना घाइतेलाई नेपाली सेनाको हेलिकोप्टरमार्फत काठमाडौंस्थित छाउनी अस्पताल लगिएको छ ।

दुर्घटनास्थलमा जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्री नेतृत्वको टोली पुगेको थियो ।

दुर्घटनाको कारणबारे प्रहरीले थप अनुसन्धान गरिरहेको जनाएको छ ।

Originally published on abcnews.com.np.