हेटौँडा, भदौ २ गते । हेटौँडा–काठमाडौँ सडकखण्डअन्तर्गत मकवानपुरको भीमफेदी गाउँपालिका–६, जुरीखेतमा उच्च अदालत वीरगन्ज, पर्साको स्कारपियो दुर्घटना हुँदा छ जना घाइते भएका छन्।

दुर्घटनामा उच्च अदालत वीरगन्जका मुख्य न्यायाधीश गोकर्ण डाँगी, रजिस्ट्रार तारादत्त बडु, उहाँकी श्रीमती, छोरा, दिदी र सवारी चालक घाइते भएका हुन्। घाइतेमध्ये रजिस्ट्रारकी श्रीमती लक्ष्मी बडुको अवस्था गम्भीर रहेको प्रहरीले जनाएको छ।

जिल्ला प्रहरी कार्यालय मकवानपुरका अनुसार दुर्घटनामा दाङको राप्ती नगरपालिका–८ का ३२ वर्षीय चालक छुनिलाल चौधरी, तुलसीपुर उपमहानगरपालिका–९ का ५७ वर्षीय मुख्य न्यायाधीश डाँगी, बैतडीको दशरथचन्द नगरपालिका–७ सुर्कालका ५१ वर्षीय रजिस्ट्रार तारादत्त बडु, उहाँकी ४९ वर्षीया श्रीमती लक्ष्मी बडु, २५ वर्षीय छोरा रितेन्द्र बडु र ३१ वर्षीया दिदी रिता बडु घाइते भएका छन्।

प्रहरीका अनुसार घाइते सबैको टाउको तथा शरीरका विभिन्न भागमा चोट लागेको छ। चालक चौधरी र रजिस्ट्रार बडुलाई थप उपचारका लागि हेटौँडा अस्पताल पठाइएको छ भने लक्ष्मी बडुसहित चार जनालाई नेपाली सेनाको हेलिकोप्टरमार्फत काठमाडौँस्थित छाउनी अस्पताल पठाइएको छ।

मंगलबार बिहान करिब ७ बजे काठमाडौँबाट वीरगन्जतर्फ जाँदै गरेको प्रदेश ३–०१–००२ झ ५१८३ नम्बरको स्कारपियो अनियन्त्रित भई सडकबाट करिब ६० मिटर तल खोल्सामा खसेर दुर्घटना भएको हो।

दुर्घटनाको खबर प्राप्त भएपछि इलाका प्रहरी कार्यालय भीमफेदीबाट ट्राफिक प्रहरीसहित सात जनाको टोली घटनास्थल पुगेको जिल्ला प्रहरी कार्यालय मकवानपुरका सूचना अधिकारी प्रहरी नायब उपरीक्षक माधवप्रसाद काफ्लेले जानकारी दिनुभयो। प्रहरीले घाइतेको उद्धार गरी प्रारम्भिक उपचारका लागि भीमफेदी अस्पताल पठाएको थियो।

प्रनाउ काफ्लेका अनुसार लक्ष्मी बडुको अवस्था गम्भीर तथा अन्य पाँच जनाको अवस्था मध्यम छ। घटनास्थलमा जिल्ला प्रहरी कार्यालय मकवानपुरका प्रहरी उपरीक्षक श्यामबहादुर खत्री नेतृत्वको टोलीसमेत पुगेको थियो।

दुर्घटनामा परेको स्कारपियो घटनास्थलमै रहेको भए पनि सडकमा यातायात भने सुचारु रहेको प्रहरीले जनाएको छ। दुर्घटनाको कारणबारे थप अनुसन्धान भइरहेको जिल्ला प्रहरी कार्यालय मकवानपुरले जनाएको छ।

Originally published on abcnews.com.np.