काठमाडौं । विदेशस्थित नेपाली नियोगहरूको घरभाडामा नेपाल सरकारले वार्षिक १ अर्ब ३९ करोड ३६ लाख रुपैयाँ खर्च गर्दै आएको छ। परराष्ट्रमन्त्री शिशिर खनालले मंगलबार प्रतिनिधिसभामा सांसद निश्कल राईको प्रश्नको जवाफ दिँदै गत आर्थिक वर्ष २०८२/८३ मा नियोगहरूको घरभाडामा उक्त रकम खर्च भएको जानकारी दिएका हुन्।

मन्त्री खनालका अनुसार घरभाडामा खर्च भएको रकम परराष्ट्र मन्त्रालयका लागि विनियोजित ७ अर्ब ८४ करोड रुपैयाँको करिब १७ प्रतिशत हो।

हाल परराष्ट्र मन्त्रालयअन्तर्गत १५ वटा महाशाखा, दुई विभाग, एक सम्पर्क कार्यालय, ३१ दूतावास, तीन स्थायी नियोग र १० वटा महावाणिज्य दूतावास सञ्चालनमा रहेका छन्।

६ नियोग बन्द गर्ने निर्णय

सरकारले चालु आर्थिक वर्ष २०८३/८४ मा विदेशस्थित तीन दूतावास, दुई महावाणिज्य दूतावास र एउटा सम्पर्क कार्यालय बन्द गर्ने निर्णय गरेको छ।

दक्षिण अफ्रिका, ब्राजिल र डेनमार्कस्थित नेपाली दूतावास बन्द गर्ने निर्णय भएको छ। त्यस्तै अमेरिकाको सान फ्रान्सिस्को र चीनको छेङ्दुस्थित महावाणिज्य दूतावास तथा भारतको विशाखपटनमस्थित दूतावासको शाखा पनि बन्द गरिने भएको छ।

आफ्नै भवन नहुँदा भाडाको भार

विदेशस्थित केही नेपाली नियोगका आफ्नै भवन रहे पनि धेरै नियोग भाडाका भवनबाट सञ्चालन भइरहेका छन्। कतिपय स्थानमा सरकारले जग्गा खरिद गरिसकेको भए पनि भवन निर्माण हुन नसक्दा हरेक वर्ष ठूलो रकम घरभाडामा खर्च भइरहेको छ।

सरकारले नियोगको संख्या घटाउने निर्णयसँगै विदेशस्थित नेपाली कूटनीतिक नियोगको सञ्चालन खर्च र घरभाडाको भारसमेत घटाउने लक्ष्य लिएको देखिन्छ।

Originally published on abcnews.com.np.