काठमाडौं । भक्तपुरको मध्यपुर थिमि नगरपालिका–१, लोकन्थली क्षेत्रमा सुनको सिक्री लुटपाट गरेको आरोपमा प्रहरीले चार जनालाई पक्राउ गरेको छ। पक्राउ पर्नेमा दुई जना लुटपाटमा संलग्न र दुई जना चोरीको सुन खरिद गर्ने व्यक्ति रहेको प्रहरीले जनाएको छ।

पक्राउ पर्नेमा काठमाडौं महानगरपालिका–३२ कोटेश्वर बस्ने भोजपुर रामप्रसादराई गाउँपालिका–२ का ३२ वर्षीय योगेन्द्र तामाङ र पेप्सिकोला बस्ने रामेछाप दोरम्बा गाउँपालिका–२ का ३६ वर्षीय देवेन्द्र थापा मगर ‘काले’ रहेका छन्।

त्यस्तै, चोरीको सुन खरिद गरेको आरोपमा काठमाडौं महानगरपालिका–१८ नरदेवी बस्ने भोजपुर रामप्रसादराई गाउँपालिका–६ का ४० वर्षीय मिलन विक र भारतको पश्चिम बंगाल, कलकत्ता घर भई भेडासिंह बस्ने ४० वर्षीय संजित साम्नत पक्राउ परेका छन्।

मोटरसाइकलमा आएर सिक्री लुटेको आरोप

प्रहरीका अनुसार गत असार २६ गते लोकन्थलीस्थित बिगमार्ट नजिकै र असार ३० गते लोकन्थली हनुमान चोकमा मोटरसाइकलमा आएका दुई जनाले पैदल हिँडिरहेका महिला तथा ज्येष्ठ नागरिकको घाँटीमा लगाएको सुनको सिक्री जबर्जस्ती तानेर फरार भएका थिए।

घटनापछि काठमाडौं उपत्यका अपराध अनुसन्धान कार्यालय, टेकुबाट खटिएको प्रहरी टोलीले अनुसन्धान अघि बढाएको थियो। अनुसन्धानका क्रममा उपत्यकाका विभिन्न स्थानबाट चारै जनालाई पक्राउ गरिएको प्रहरीले जनाएको छ।

चोरीको सुन खरिद गर्ने पनि पक्राउ

प्रहरीले लुटपाटमा संलग्न व्यक्तिसँगै चोरीको सुन खरिद गर्ने व्यक्तिलाई समेत पक्राउ गरेको छ। उनीहरूको संलग्नताबारे थप अनुसन्धान भइरहेको प्रहरीले जनाएको छ।

पक्राउ परेका चारै जनालाई थप अनुसन्धान तथा कानुनी कारबाहीका लागि प्रहरी वृत्त सातदोबाटो, ललितपुर पठाइएको छ।

प्रहरीले घटनामा संलग्न अन्य व्यक्तिहरूको खोजी भइरहेको जनाएको छ।

Originally published on abcnews.com.np.