काठमाडौं । नेपालका लागि डोङफेङ नामीको आधिकारिक आयातकर्ता एमएडब्लू वृद्धि मोटर्सले नेपाली बजारमा नयाँ इलेक्ट्रिक एसयूभी ‘नामी भिगो E2’ सार्वजनिक गर्ने तयारी गरेको छ।

कम्पनीका अनुसार आगामी अगस्ट १९, २०२६ मा विशेष कार्यक्रम आयोजना गरी भिगो E2 लाई औपचारिक रूपमा नेपाली बजारमा सार्वजनिक गरिनेछ।

कम्पनीले नयाँ भिगो E2 लाई ‘फुल एसयूभी’ का रूपमा प्रस्तुत गरेको छ। फराकिलो स्पेस, आधुनिक फिचर र व्यावहारिक पर्फर्मेन्समार्फत ग्राहकलाई पूर्ण एसयूभीको अनुभव दिने उद्देश्यले गाडी ल्याउन लागिएको एमएडब्लू वृद्धिले जनाएको छ।

२ हजारभन्दा बढी नामी गाडी सञ्चालनमा

नेपाली बजारमा छोटो समयमै नामीले राम्रो उपस्थिति बनाउन सफल भएको कम्पनीको दाबी छ। हालसम्म नेपालभर २ हजारभन्दा बढी नामी गाडी सञ्चालनमा रहेको जनाइएको छ।

कम्पनीका अनुसार नामी भिगोले मनाङ, मुस्ताङ र शुक्लाफाँटालगायत भौगोलिक रूपमा चुनौतीपूर्ण क्षेत्रमा समेत आफ्नो क्षमता र भरपर्दो प्रदर्शन प्रमाणित गरिसकेको छ।

सहरदेखि लामो यात्रासम्म

नयाँ भिगो E2 लाई दैनिक शहरी आवागमनदेखि लामो दूरीको यात्रासम्मका लागि उपयुक्त हुने गरी डिजाइन गरिएको कम्पनीले जनाएको छ।

गाडीमा फराकिलो क्याबिन, पर्याप्त स्पेस र उत्कृष्ट पर्फर्मेन्स उपलब्ध हुने दाबी गरिएको छ। नेपाली सडकको विविध अवस्था र ग्राहकको बढ्दो ईभी मागलाई ध्यानमा राखेर नयाँ मोडल ल्याउन लागिएको कम्पनीको भनाइ छ।

मूल्य र स्पेसिफिकेसन सार्वजनिक हुँदै

अगस्ट १९ मा हुने सार्वजनिक कार्यक्रममा नै भिगो E2 को आधिकारिक मूल्य, विस्तृत प्राविधिक स्पेसिफिकेसन, फिचर तथा अन्य जानकारी सार्वजनिक गरिने एमएडब्लू वृद्धि मोटर्सले जनाएको छ।

नयाँ भिगो E2 को आगमनसँगै नेपाली इलेक्ट्रिक एसयूभी बजारमा प्रतिस्पर्धा थप रोचक हुने अपेक्षा गरिएको छ।

Originally published on abcnews.com.np.