काठमाडौँ । सत्तारुढ राष्ट्रिय स्वतन्त्र पार्टी (रास्वपा) की सांसद अफ्सना बानुले उद्योगमन्त्री गौरी यादवले सांसदहरूलाई ग्यास उपलब्ध गराइरहेको दाबी गरेकी छन् ।

बानुका अनुसार उद्योगमन्त्री यादवले आफैँ फोन गरेर ग्यास आवश्यक भए जानकारी गराउन सांसदहरूलाई आग्रह गरिरहेका छन् । आफूलाई पनि मन्त्रीले फोन गरेर ग्यास आवश्यक भए उपलब्ध गराउने बताएको उनले जानकारी दिइन् ।

बुधबार सञ्चारकर्मीसँग कुरा गर्दै सांसद बानुले आफूले भने मन्त्रीको प्रस्ताव अस्वीकार गरेको बताइन् । घरमा ग्यास भएकाले अभावका बेला सर्वसाधारण घण्टौँसम्म लाइनमा बसिरहेका अवस्थामा आफूले थप ग्यास नलिएको उनको भनाइ छ ।

‘उद्योगमन्त्री स्वयं पनि सबैलाई कल गरिरहनुभएको छ । मलाई पनि फोन आएको थियो, “हजुरलाई पनि ग्यास चाहिन्छ भने भन्नुहोला, हामी सबै सांसदज्यूहरूलाई उपलब्ध गराइराछौँ” भन्ने खालको कुरा आएको थियो,’ उनले भनिन् ।

ग्यासको कालोबजारीबारे भने बानुले यसलाई सामान्य रूपमा लिनुपर्ने तर्क गरिन् । ‘कालोबजारी त अफकोर्स हुन्छ, हरेक ठाउँमा हुन्छ । हरेक कन्ट्रीमा हुन्छ, नेपाल मात्र होइन,’ उनले भनिन् ।

उनले सरकारले ग्यासको अभाव र कालोबजारीलाई गम्भीरतापूर्वक हेरिरहेको दाबी गर्दै केही दिनमै आपूर्ति सहज हुने बताइन् ।

‘यसलाई सरकारले एकदम गम्भीरतापूर्वक हेरिराख्नु भएको छ,’ उनले भनिन्, ‘अब केही दिनमै कालोबजारी कम हुन्छ र ग्यासको आपूर्ति पनि सहज हुन्छ ।’

Originally published on abcnews.com.np.