काठमाडौँ — नेपाल सरकार र राष्ट्र, राष्ट्रियता, धर्म, संस्कृति तथा नागरिक बचाउ महाअभियानबीच विभिन्न माग सम्बोधन गर्ने विषयमा आजदेखि औपचारिक वार्ता सुरु भएको छ।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा वार्ता सुरु भएको प्रधानमन्त्रीका प्रेस तथा अनुसन्धान विज्ञ दीपा दाहालले जानकारी दिइन्। महाअभियानले अघि सारेका माग तथा त्यसको समाधानका उपायबारे दुवै पक्षबीच छलफल हुने बताइएको छ।

सरकारले यसअघि भदौ १ गते गृह मन्त्रालयका सहसचिव लीलाधर सुवेदीको संयोजकत्वमा वार्ता टोली गठन गरेको थियो। टोलीमा गृह मन्त्रालयका सहसचिव आनन्द काफ्ले, अर्थ मन्त्रालयका सहसचिव महेश आचार्य तथा भूमि व्यवस्था, सहकारी, संघीय मामिला तथा सामान्य प्रशासन मन्त्रालयका सहसचिव डिलाराम पन्थी सदस्य छन्।

सरकारको आह्वानपछि महाअभियानका केन्द्रीय अध्यक्ष दुर्गा प्रसाईंले पनि विष्णु बोहरा क्षेत्रीको संयोजकत्वमा नौ सदस्यीय वार्ता टोली गठन गरेका थिए। सोही टोली वार्तामा सहभागी भएको हो।

वार्तामार्फत महाअभियानले उठाउँदै आएका मागबारे सरकारको धारणा र समाधानका सम्भावित विकल्प खोजिने अपेक्षा गरिएको छ। दुवै पक्षबीचको औपचारिक संवाद सुरु भएसँगै लामो समयदेखि उठ्दै आएका माग राजनीतिक तथा संवादको प्रक्रियाबाट सम्बोधन गर्ने प्रयास अघि बढेको छ।

Originally published on abcnews.com.np.