काठमाडौँ । उपत्यकाको सार्वजनिक यातायातलाई प्रविधिमैत्री र व्यवस्थित बनाउने उद्देश्यले संघीय राजधानी सहरी क्षेत्र सार्वजनिक यातायात परिषद्ले ‘केटीएम पब्लिक ट्रान्सपोर्ट’ नामक मोबाइल एप्लिकेसन सार्वजनिक गरेको छ।

परिषद्को बुधबार सम्पन्न तेस्रो बैठकमा परिषद्का अध्यक्ष एवं काठमाडौँ महानगरपालिकाका कार्यवाहक प्रमुख सुनिता डंगोलले एप सार्वजनिक गरेकी हुन्। एपमार्फत जीपीएस जडान गरिएका करिब १ हजार २ सय सार्वजनिक सवारीसाधनको अवस्थिति तथा सम्बन्धित जानकारी प्राप्त गर्न सकिने परिषद्ले जनाएको छ।

परिषद्का अनुसार एपलाई आगामी दिनमा थप सवारीसाधन र सेवासँग जोड्दै विस्तार गर्ने योजना छ। यसले यात्रुलाई आफूले प्रयोग गर्ने सार्वजनिक सवारीसाधनको अवस्था तथा रुटसम्बन्धी जानकारी सहज रूपमा प्राप्त गर्न सहयोग पुग्ने अपेक्षा गरिएको छ।

‘सार्वजनिक यातायात सबै पालिकाको साझा विषय’

बैठकलाई सम्बोधन गर्दै परिषद् अध्यक्ष डंगोलले काठमाडौँ उपत्यकाको सार्वजनिक यातायात प्रणालीलाई थप सरल, सहज र सबैको पहुँचमा पुग्ने बनाउन स्थानीय तहबीच प्रभावकारी समन्वय आवश्यक रहेको बताइन्।

उनले विशेषगरी रात्रिकालीन सार्वजनिक यातायात विस्तार गर्न तथा बिहानैदेखि विद्यार्थीका लागि सार्वजनिक यातायात सेवा उपलब्ध गराउन स्थानीय तहबीच वित्तीय साझेदारीसहित संयुक्त कार्यक्रम अघि बढाउनुपर्नेमा जोड दिइन्।

‘सार्वजनिक यातायात कुनै एक पालिकाको मात्र दायित्व होइन, यो सबै पालिकाहरूको साझा विषय हो,’ डंगोलले भनिन्, ‘त्यसैले आपसी समन्वयमार्फत कार्यक्रम र सेवामा एकरूपता ल्याउन आवश्यक छ।’

यात्रामैत्री सार्वजनिक यातायातमा जोड

परिषद्का उपाध्यक्ष एवं ललितपुर महानगरपालिकाका प्रमुख चिरीबाबु महर्जनले सार्वजनिक बस प्रयोग गर्ने यात्रुले सहज र सुरक्षित महसुस गर्ने वातावरण निर्माण गर्नुपर्ने बताए।

उनले सार्वजनिक यातायात सुधारका लागि परिषद्सँग आवश्यक क्षमता र अधिकार रहेकाले त्यसको प्रभावकारी उपयोग गर्नुपर्नेमा जोड दिए।

‘सार्वजनिक यातायात सुधारका लागि यो परिषद्मा क्षमता छ, त्यसैले यसको सही प्रयोग गरौँ,’ महर्जनले भने।

बस स्टपदेखि नगदरहित भाडासम्मको योजना

बैठकमा परिषद्का कार्यकारी अधिकृत कुबेर नेपालीले अघिल्लो वर्ष सरकारले परिषद्लाई खारेजीको सूचीमा राखेका कारण केही निर्धारित काम अघि बढाउन नसकिएको जानकारी दिए।

यस वर्ष भने सार्वजनिक यातायात सुधारका लागि विभिन्न कार्यक्रम अघि बढाउने निर्णय गरिएको छ। परिषद्ले बस स्टपर तथा पिक–ड्रप प्वाइन्ट निर्धारण गर्ने, रात्रिकालीन बस सञ्चालनका लागि आवश्यक सर्त र सम्झौताको मोडल तयार गर्ने तथा सम्बन्धित नगरपालिकासँग सहकार्य अघि बढाउने निर्णय गरेको छ।

त्यसैगरी स्थानीय तहसँगको साझेदारीमा मुख्य बस स्टप र बसपार्कलगायतका स्थानमा जीपीएस ट्र्याकिङसहितको सार्वजनिक यातायात सूचना प्रणाली जडान गर्ने योजना अघि सारिएको छ।

परिषद्ले सार्वजनिक यातायातमा नगदरहित भाडा प्रणाली लागू गर्न आवश्यक कानुनी पूर्वाधार तयार गर्ने कार्यक्रमसमेत स्वीकृत गरेको छ। यात्रुलाई टिकट लिन प्रोत्साहित गर्न जनचेतनामूलक अभियान सञ्चालन गर्ने तथा सार्वजनिक यातायातसम्बन्धी विभिन्न अध्ययन र अनुसन्धानलाई समेत प्राथमिकता दिने निर्णय भएको छ।

परिषद्का यी कार्यक्रम कार्यान्वयनमा आए उपत्यकाको सार्वजनिक यातायातमा यात्रुले सवारीसाधनको अवस्थिति, रुट र सेवा समयबारे वास्तविक समयमा जानकारी पाउने तथा भाडा भुक्तानी प्रणालीसमेत क्रमशः डिजिटल बन्ने अपेक्षा गरिएको छ।

Originally published on abcnews.com.np.