काठमाडौँ । राष्ट्रिय प्रजातन्त्र पार्टी (राप्रपा) ले बागमती प्रदेश संसदीय दलका नेता उद्धव थापालाई स्पष्टीकरण सोधेको छ। पार्टीको निर्देशनविपरीत बागमती प्रदेश सरकार गठनका क्रममा नेकपा एमालेका उम्मेदवारलाई समर्थन गरेको आरोपमा थापामाथि कारबाही प्रक्रिया अघि बढाइएको हो।

राप्रपाको अनुशासन समितिको बैठकले थापालाई १२ घण्टाभित्र लिखित स्पष्टीकरण पेस गर्न निर्देशन दिएको पार्टीका प्रवक्ता मोहन श्रेष्ठले जानकारी दिएका छन्।

यस घटनापछि राप्रपाले भोलि पुस २१ गते केन्द्रीय कार्यसम्पादन समितिको आकस्मिक बैठक पनि बोलाएको छ। बैठक दिउँसो १२ बजे पार्टीको केन्द्रीय कार्यालय धुम्बाराहीमा बस्ने जनाइएको छ।

एमालेका किरण थापालाई समर्थन गरेको विषयमा विवाद

बागमती प्रदेशमा नयाँ सरकार गठनको प्रक्रिया चलिरहेका बेला एमालेका किरण थापालाई मुख्यमन्त्री पदका लागि राप्रपाको संसदीय दलबाट समर्थन गरिएको थियो।

तर पार्टी केन्द्रले उक्त समर्थन पार्टीको आधिकारिक निर्णयविपरीत भएको जनाएको छ। प्रवक्ता श्रेष्ठका अनुसार उद्धव थापाले गरेको समर्थन केन्द्रीय कार्यसम्पादन समितिको निर्णय तथा बागमती प्रदेश संसदीय दलको पूर्वनिर्णयविपरीत रहेको छ।

उनले उक्त कदमलाई प्रारम्भिक रूपमा नै अवैधानिक, अनधिकृत र अराजनीतिक कार्यका रूपमा व्याख्या गरेका छन्।

‘यो समर्थन पार्टीको केन्द्रीय कार्यसम्पादन समितिको निर्णय र बागमती प्रदेश संसदीय दल स्वयंको सोहीबमोजिमको निर्णयविपरीत छ,’ प्रवक्ता श्रेष्ठले बताएका छन्।

केन्द्रीय कार्यसम्पादन समितिको बैठकबाट थप निर्णय हुने

उद्धव थापामाथि अनुशासनात्मक कारबाही अघि बढाउने विषयमा राप्रपाको केन्द्रीय कार्यसम्पादन समितिको आकस्मिक बैठकले थप निर्णय गर्न सक्ने देखिएको छ।

पार्टीले दिएको १२ घण्टे समयसीमाभित्र थापाले पेस गर्ने स्पष्टीकरणका आधारमा आगामी कदम तय हुने सम्भावना छ।

थापाले अहिलेसम्म दिएनन् औपचारिक प्रतिक्रिया

राप्रपाले स्पष्टीकरण सोधेको विषयमा उद्धव थापाले अहिलेसम्म सार्वजनिक रूपमा औपचारिक प्रतिक्रिया दिएका छैनन्।

पार्टी निर्देशनविपरीत एमाले उम्मेदवारलाई समर्थन गरिएको घटनाले राप्रपाभित्रको आन्तरिक विवादलाई थप सतहमा ल्याएको छ। अब केन्द्रीय कार्यसम्पादन समितिको आकस्मिक बैठक र उद्धव थापाले दिने स्पष्टीकरणले यो प्रकरण कुन दिशातर्फ जान्छ भन्ने टुंगो लाग्नेछ।

Originally published on abcnews.com.np.