सुर्खेत । कर्णाली प्रदेशका मुख्यमन्त्री मंगलबहादुर शाहीले जनताको लामो संघर्ष र बलिदानीबाट प्राप्त संघीयता तथा प्रदेश संरचना कसैको हल्का टिप्पणी वा राजनीतिक बहसका आधारमा खारेज हुन नसक्ने बताएका छन्।

कर्णाली प्रदेश स्थापना तथा सहिद दिवसका अवसरमा आयोजित समारोहलाई सम्बोधन गर्दै मुख्यमन्त्री शाहीले छुट्टै प्रदेश स्थापनाका लागि कर्णालीका तत्कालीन १० वटै जिल्लाका जनताले गरेको आन्दोलन स्मरण गरे।

उनले जनताको संघर्षकै परिणामस्वरूप कर्णाली छुट्टै प्रदेशका रूपमा स्थापित भएको भन्दै प्रदेश स्थापना दिवस कर्णालीवासीका लागि विशेष महत्वको दिन भएको बताए।

मुख्यमन्त्री शाहीले संघीयता कार्यान्वयनपछि तीन तहका सरकार सञ्चालनमा रहेको उल्लेख गर्दै प्रदेश सरकार जनताको बलिदानीबाट प्राप्त संरचना भएको बताए। संविधान संशोधन तथा संघीयताको स्वरूपबारे बहस भइरहेका बेला प्रदेश संरचनाको औचित्यमाथि प्रश्न उठाउने प्रयासप्रति उनले असन्तुष्टि जनाए।

उनका अनुसार प्रदेश संरचनाको सुरुवाती चरणमा देखिएका कमजोरी, जनशक्ति अभाव, सीमित आर्थिक स्रोत र संस्थागत अपर्याप्ततालाई आधार बनाएर प्रदेश नै आवश्यक छैन भन्ने निष्कर्षमा पुग्न मिल्दैन।

“संघीयता र प्रदेश संरचना जनताको बलिदानी, रगत र पसिनाबाट प्राप्त भएको हो,” उनले भने, “आज कसैका सम्मेलन वा हल्का टिप्पणीमार्फत प्रदेश सभा वा प्रदेश संरचना आवश्यक छैन भन्दैमा यो संरचना हट्नेवाला छैन।”

प्रदेश सरकारले अपेक्षाअनुसार काम गर्न नसकेको स्वीकार गर्दै मुख्यमन्त्री शाहीले कमजोरी सुधार गर्दै प्रदेश संरचनालाई थप व्यवस्थित, सक्षम र प्रभावकारी बनाउनुपर्नेमा जोड दिए।

Originally published on abcnews.com.np.