जनकपुरधाम । सिरहाको नवराजपुर गाउँपालिका–४ मा श्रीमतीमाथि अमानवीय ढंगले घरेलु हिंसा गरेको आरोपमा पक्राउ परेका ३३ वर्षीय रामशंकर यादवलाई जिल्ला अदालत सिरहाले पुर्पक्षका लागि कारागार चलान गर्ने आदेश दिएको छ।

प्रहरीका अनुसार गत साउन ५ गते राति करिब १० बजे यादवले आफ्ना भाइ श्यामसुन्दर यादवको सहयोगमा घरभित्रै श्रीमती सञ्जनामाथि कुटपिट गरेका थिए।

आरोपअनुसार यादवले घरका झ्यालढोका बन्द गरी भात पकाउने चुलोमा फलामको रड तताएर श्रीमतीका हातखुट्टा तथा शरीरका विभिन्न भागमा प्रहार गरेका थिए। पीडितलाई हातखुट्टा बाँधेर मुखमा कपडा कोचिएको समेत प्रहरीले जनाएको छ।

घरभित्रबाट चर्को आवाज र झगडाको आवाज आएपछि छिमेकीहरूले ढोका फोडेर सञ्जनाको उद्धार गरेका थिए। त्यसपछि प्रहरीलाई खबर गरी उनलाई उपचारका लागि नवराजपुरस्थित सरकारी अस्पतालमा भर्ना गरिएको थियो।

मोबाइलमा आएको फोन उठाएको विषयमा विवाद

पीडित सञ्जनाका अनुसार श्रीमान्को मोबाइलमा आएको फोन उठाएर कुराकानी गरेको विषयलाई लिएर आफूलाई चरम यातना दिइएको हो।

उनले हातखुट्टाका नङ निकाल्न प्रयोग गर्ने उद्देश्यले दुईवटा पिलाससमेत तयारी अवस्थामा राखिएको दाबी गरेकी छन्। छिमेकीहरू समयमै नआएको भए आफ्नो ज्यानसमेत जान सक्ने अवस्था रहेको उनको भनाइ छ।

अनुसन्धानपछि अदालतको आदेश

घटनालगत्तै इलाका प्रहरी कार्यालय महेशपुर पतारीले रामशंकर यादवलाई नियन्त्रणमा लिएको थियो। प्रहरीले अनुसन्धान पूरा गरी उनलाई आवश्यक कानुनी कारबाहीका लागि जिल्ला अदालत सिरहामा पेश गरेको थियो।

अदालतको आदेशपछि यादवलाई पुर्पक्षका लागि कारागार चलान गरिएको प्रहरीले जनाएको छ। घटनामा संलग्न भनिएका अन्य व्यक्तिमाथि समेत अनुसन्धान भइरहेको प्रहरीले जानकारी दिएको छ।

Originally published on abcnews.com.np.