कालीकोट । कालीकोटको पचालझरना गाउँपालिकाले विद्यालयको शैक्षिक नेतृत्व सुधार गर्ने उद्देश्यले पहिलोपटक खुला प्रतिस्पर्धाबाट १५ वटा विद्यालयमा प्रधानाध्यापक नियुक्त गरेको छ।

गाउँपालिकाले स्थायी शिक्षकहरूमध्येबाट आवेदन माग गरी तोकिएको मापदण्डका आधारमा प्रधानाध्यापक छनोट गरेको हो।

गाउँपालिकाले शिक्षा नियमावली, २०५९ को दसौँ संशोधन (२०८३) तथा ‘प्रधानाध्यापक व्यवस्थापन, शिक्षक सरुवा तथा कामकाजसम्बन्धी कार्यविधि, २०८३’ बमोजिम प्रधानाध्यापक पदपूर्तिको प्रक्रिया अघि बढाएको थियो।

गत साउन १८ गते योग्यता पुगेका स्थायी शिक्षकबाट आवेदन माग गरिएकोमा १६ जनाको दरखास्त स्वीकृत भएको गाउँपालिकाले जनाएको छ।

गाउँ शिक्षा समितिको भदौ ३ गतेको निर्णयअनुसार १५ विद्यालयका लागि प्रधानाध्यापक नियुक्त गरिएको गाउँपालिका शिक्षा शाखा प्रमुख एवं वरिष्ठ शिक्षा अधिकृत ध्रुव संज्यालले जानकारी दिए।

उनका अनुसार कार्यविधिले निर्धारण गरेको मापदण्डका आधारमा प्रधानाध्यापक छनोट गरिएको हो। विद्यालयको शैक्षिक तथा प्रशासनिक नेतृत्वलाई थप प्रभावकारी बनाउने उद्देश्यले प्रतिस्पर्धात्मक प्रक्रिया अपनाइएको उनले बताए।

प्रतिस्पर्धात्मक प्रक्रियाबाट छनोट

गाउँपालिकाले शिक्षा नियमावली तथा प्रधानाध्यापक व्यवस्थापनसम्बन्धी कार्यविधिमा तोकिएका मापदण्डअनुसार योग्यता पुगेका स्थायी शिक्षकबाट आवेदन माग गरेको थियो।

प्राप्त आवेदनमध्ये १६ जनाको दरखास्त स्वीकृत भएपछि गाउँ शिक्षा समितिको निर्णयबाट १५ विद्यालयमा प्रधानाध्यापक नियुक्त गरिएको हो।

गाउँपालिकाले खुला प्रतिस्पर्धाबाट प्रधानाध्यापक नियुक्त गर्ने प्रक्रियाले विद्यालयको शैक्षिक तथा प्रशासनिक नेतृत्वलाई थप जिम्मेवार, सक्षम र परिणाममुखी बनाउने अपेक्षा गरेको छ।

Originally published on abcnews.com.np.