महेन्द्रनगर । अख्तियार दुरुपयोग अनुसन्धान आयोगको महेन्द्रनगरस्थित टोलीले कैलालीको गौरीगंगा नगरपालिका–४ मा रहेको कालिका माध्यमिक विद्यालयका विद्यालय व्यवस्थापन समिति सदस्य देवबहादुर बमलाई दुई लाख रुपैयाँ घुससहित पक्राउ गरेको छ।

अख्तियारका अनुसार विद्यालयमा कार्यरत एक कर्मचारीको सेवासुविधा वृद्धि गरिदिने भन्दै रकम मागेपछि बममाथि निगरानी बढाइएको थियो। रकम लेनदेन भइरहेको अवस्थामा अख्तियारको टोलीले उनलाई नियन्त्रणमा लिएको हो।

अख्तियार कार्यालय कञ्चनपुरका प्रवक्ता चेतराज भट्टका अनुसार पक्राउपछि घटनास्थलमा आवश्यक कानुनी प्रक्रिया पूरा गर्ने काम भइरहेको छ।

‘अहिले घटनास्थलको सबै प्रक्रिया पूरा भइरहेको छ,’ प्रवक्ता भट्टले भने, ‘यसपछि विस्तृत अनुसन्धान सुरु हुन्छ।’

अख्तियारले प्राप्त उजुरीका आधारमा यस प्रकरणमा निगरानी गर्दै विशेष ‘स्ट्रिङ अप्रेसन’ सञ्चालन गरेको जनाएको छ। कर्मचारीको सेवासुविधा वृद्धि गर्ने प्रक्रियामा रकम मागिएको आरोपमा बमलाई नियन्त्रणमा लिइएको हो।

पक्राउ परेका बममाथि अब घुस माग तथा भ्रष्टाचारसम्बन्धी कसुरमा अनुसन्धान अघि बढाइने अख्तियारले जनाएको छ। अनुसन्धानका क्रममा रकम मागिएको कारण, यसमा अन्य व्यक्तिको संलग्नता भए–नभएको तथा विद्यालयको प्रशासनिक प्रक्रियामा कुनै अनियमितता भएको छ कि छैन भन्ने विषयसमेत खुल्ने अपेक्षा गरिएको छ।

अख्तियारले घटनासँग सम्बन्धित प्रमाण संकलन र आवश्यक बयान लिने प्रक्रिया अघि बढाएको जनाएको छ।

Originally published on abcnews.com.np.