काठमाडौं । राष्ट्रिय स्वतन्त्र पार्टी (रास्वपा)को केन्द्रीय समितिको बैठक आज बिहान ११ बजे बस्ने भएको छ। पार्टी केन्द्रीय कार्यालय वनस्थलीमा बस्ने बैठकमा स्थानीय निर्वाचनको तयारीदेखि पार्टी संगठन विस्तारसम्मका विषयमा छलफल हुने भएको छ।

रास्वपाका महामन्त्री विपिनकुमार आचार्यका अनुसार बैठकमा पार्टीको दस्तावेज तथा स्थानीय निर्वाचनका लागि ‘उम्मेदवार छनोट रूपरेखा–२०८३’ अनुमोदन गर्ने विषयमा छलफल हुनेछ।

त्यस्तै, ‘राइट टु रिकल’ सम्बन्धी दस्तावेज निर्माण गर्ने विषय पनि बैठकको एजेन्डामा राखिएको छ।

बैठकमा केन्द्रीय समिति सदस्य, पदाधिकारी तथा सचिवालय सदस्य मनोनयनका साथै विभागीय प्रमुखहरूको मनोनयनबारे पनि छलफल हुने जनाइएको छ। स्थानीय निर्वाचनका लागि केन्द्रीय उम्मेदवार छनोट समितिका सदस्य मनोनयनको विषयसमेत बैठकमा उठ्नेछ।

पार्टीका आगामी योजना, कार्यक्रम तथा अभियानका विषयमा पनि बैठकमा छलफल हुनेछ। महामन्त्री आचार्यका अनुसार केन्द्रीय समिति तथा प्रतिनिधिसभा सदस्य नेतृत्वमा स्थानीय तहमा ‘उम्मेदवार छनोट रूपरेखा’ सम्बन्धी अभिमुखीकरण तथा प्रशिक्षण कार्यक्रम सञ्चालन गर्ने विषय पनि एजेन्डामा छ।

‘स्वतन्त्र’ नामक डिजिटल पत्रिका प्रकाशन गर्ने तयारी

रास्वपाले पार्टीको मुखपत्रका रूपमा ‘स्वतन्त्र’ नामक मासिक डिजिटल पत्रिका प्रकाशन गर्ने तयारी गरेको छ। यससम्बन्धी प्रस्तावमाथि पनि केन्द्रीय समिति बैठकमा छलफल हुने महामन्त्री आचार्यले जानकारी दिएका छन्।

बैठकले आगामी स्थानीय निर्वाचनलाई लक्षित गर्दै उम्मेदवार छनोट प्रक्रिया, संगठनात्मक जिम्मेवारी र पार्टीका कार्यक्रम तथा अभियानलाई थप व्यवस्थित गर्ने विषयमा आवश्यक निर्णय गर्ने अपेक्षा गरिएको छ।

Originally published on abcnews.com.np.