काठमाडौँ । आज शुक्रबार काठमाडौँ उपत्यकासहित देशभर वर्षा र हिमपातको सम्भावना रहेको मौसम पूर्वानुमान महाशाखाले जनाएको छ।

महाशाखाले बिहान ८ बजे जारी गरेको मौसम बुलेटिनअनुसार आज दिउँसो देशभर साधारणतया बदली रहनेछ। हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।

बागमती, गण्डकी र लुम्बिनी प्रदेशका तराई भूभागका केही स्थान तथा मधेस, कोसी र सुदूरपश्चिम प्रदेशका तराई भूभागका थोरै स्थानमा समेत मेघगर्जन र चट्याङसहित मध्यम वर्षा हुनसक्ने महाशाखाले जनाएको छ।

कोसी, बागमती र गण्डकी प्रदेशका पहाडी भूभागका एक–दुई स्थानमा भारी वर्षाको सम्भावना रहेको छ।

राति पनि देशभर साधारणतया बदली रहनेछ। कोसी, बागमती र गण्डकी प्रदेशका हिमाली भूभागका केही स्थान तथा लुम्बिनी, कर्णाली र सुदूरपश्चिम प्रदेशका हिमाली भूभागका थोरै स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।

कोसी, बागमती, गण्डकी र लुम्बिनी प्रदेशका पहाडी भूभागका धेरै स्थान तथा कर्णाली र सुदूरपश्चिम प्रदेशका पहाडी भूभागका केही स्थानमा मेघगर्जन र चट्याङसहित मध्यम वर्षाको सम्भावना रहेको महाशाखाले जनाएको छ। तराईका केही स्थानमा पनि मध्यम वर्षा हुनसक्ने जनाइएको छ।

काठमाडौंमा साँझ–राति वर्षाको सम्भावना

मौसमविद् डेभिड ढकालका अनुसार काठमाडौँ उपत्यकामा दिउँसोपछि बादल बढ्दै गएर अपराह्नदेखि साँझसम्म वर्षा हुने सम्भावना छ।

उपत्यकामा विशेषगरी साँझ वा राति मध्यम र खण्डीकृत वर्षाको सम्भावना रहेको उनले बताएका छन्। खण्डीकृत वर्षा भन्नाले उपत्यकाको कुनै स्थानमा पानी पर्ने र अर्को स्थानमा नपर्ने अवस्था हो।

२५ जिल्लामा आकस्मिक बाढीको जोखिम

बाढी पूर्वानुमान महाशाखाले काठमाडौँसहित विभिन्न २५ जिल्ला र आसपासका ससाना नदीमा बहाब बढ्ने तथा आकस्मिक बाढीको मध्यम जोखिम रहेको जनाएको छ।

महाशाखाका अनुसार ताप्लेजुङ, पाँचथर, तेह्रथुम, सङ्खुवासभा, भोजपुर, दोलखा, काभ्रेपलाञ्चोक, ललितपुर, भक्तपुर, काठमाडौँ, सिन्धुपाल्चोक, नुवाकोट, रसुवा, धादिङ, गोरखा, तनहुँ, लमजुङ, कास्की, स्याङ्जा, पर्वत, म्याग्दी, बागलुङ, रुकुमपूर्व, रुकुमपश्चिम र जाजरकोट भएर बहने ससाना नदी तथा खोलामा बहाब उल्लेख्य बढ्नसक्ने चेतावनी दिइएको छ।

लगातार वर्षाका कारण पहाडी क्षेत्रमा पहिरो तथा नदी–खोलामा आकस्मिक बाढीको जोखिम रहेकाले यात्रा गर्दा आवश्यक सावधानी अपनाउन सम्बन्धित निकायले आग्रह गरेको छ।

Originally published on abcnews.com.np.