मकवानपुर । हेटौँडा उपमहानगरपालिका–१९ वासुदेवस्थित वासुदेव खहरे खोलाले बगाएर बेपत्ता भएकी ११ वर्षीया बालिका सुमित्रा भोलनको शव चौथो दिनमा फेला परेको छ ।

मङ्गलबार साँझ विद्यालयबाट घर फर्कने क्रममा खोलाले बगाएर बेपत्ता भएकी भोलनको शव शुक्रबार बिहान फेला परेको जिल्ला प्रहरी कार्यालय मकवानपुरले जनाएको छ ।

प्रहरी नायब उपरीक्षक माधवप्रसाद काफ्लेका अनुसार प्रहरी र स्थानीयवासीले खोजी गर्ने क्रममा बिहान ७ बजे खोलाले बगाएको स्थानबाट करिब पाँच किलोमिटर तल मनहरी गाउँपालिका–३ लामिटारस्थित राप्ती खोलामा कास र बालुवामा अल्झिएको अवस्थामा शव फेला परेको हो ।

मङ्गलबार साँझ ५ः५५ बजे हेटौँडा–१९ बस्तीपुरस्थित निर्मल माध्यमिक विद्यालयबाट घर फर्कने क्रममा वासुदेव खहरे खोला तर्ने क्रममा चार बालिकालाई खोलाले बगाएको थियो ।

बगाएकामध्ये १२ वर्षीया विनिता ब्लोनको शव बुधबार फेला परेको थियो । नेपाल प्रहरी र सशस्त्र प्रहरीको टोलीले बगाएको स्थानबाट करिब चार किलोमिटर तल वासुदेव खोलाको किनारमा उनको शव फेला पारेको थियो ।

त्यस्तै, आठ वर्षीया रोशनी स्याङ्तानलाई रुखको जरामा अड्किएको अवस्थामा उद्धार गरी अस्पताल लगिएकोमा चिकित्सकले मृत घोषणा गरेका थिए ।

खोलाले बगाएकी १३ वर्षीया सीमा भोलनलाई भने सकुशल उद्धार गरिएको थियो । उनको हेटौँडा अस्पतालमा उपचार गरिएको प्रहरी नायब उपरीक्षक काफ्लेले जानकारी दिनुभयो ।

खोलाले बगाएका चारै बालिका मकवानपुरको राक्सिराङ गाउँपालिका–१ भूमेथुमका स्थायी बासिन्दा रहेको प्रहरीले जनाएको छ ।

यससँगै विद्यालयबाट घर फर्कने क्रममा वासुदेव खहरे खोलाले बगाउँदा एउटै गाउँका तीन बालिकाको मृत्यु भएको छ ।

Originally published on abcnews.com.np.