गौशालास्थित पिंगलास्थानको नेपाल संगीत विद्यालयमा रहेको स्टुडियोमा आयोजित स्वरांकन कार्यक्रममा चलचित्रका कलाकार तथा निर्माणपक्षको सहभागिता थियो। चलचित्रका मुख्य कलाकार हरिवंश आचार्यले डबिङको सुरुवात गरेका हुन्।

निर्माणपक्षका अनुसार चलचित्रको सम्पूर्ण साउन्डको काम डल्बी एट्मस प्रविधिबाट गरिँदैछ। यसबाट दर्शकले चलचित्र प्रदर्शनका क्रममा उच्च गुणस्तरको ध्वनि अनुभव गर्न सक्ने अपेक्षा गरिएको छ।

निर्देशक वसन्त निरौलाले पोस्ट प्रोडक्सनको काम सुरु भएसँगै डबिङ पनि थालिएको बताए। उनले चलचित्रको प्राविधिक पक्षमा कुनै सम्झौता नगरिएको दाबी गरे।

“हामीले पोस्ट प्रोडक्सनको काम सुरु गरेसँगै स्वरांकन गर्न थालेका छौँ। कुनै पनि हिसाबमा सम्झौता गरेका छैनौँ। दर्शकलाई प्राविधिक रूपमा अब्बल सिनेमा दिनेछौँ, जुन उनीहरूले प्रत्यक्ष देख्न र महसुस गर्न सक्नेछन्,” निरौलाले भने।

काली रानी फिल्मस्को ब्यानरमा निर्माण भइरहेको चलचित्रमा अनुभवी कलाकारसँगै नयाँ पुस्ताका चर्चित कलाकारको अभिनय छ। हरिवंश आचार्य, जितु नेपाल, आर्यन सिग्देल, महेश त्रिपाठी र सुशील सिटौला मुख्य भूमिकामा छन्।

त्यस्तै, दीपाश्री निरौला, सरिता गिरी, विनोद न्यौपाने, रमा थपलिया, प्रशान्त ताम्राकार, इभा गिरी र सिता न्यौपाने लगायतका कलाकारको पनि चलचित्रमा अभिनय रहेको छ।

चलचित्रका प्रस्तुतकर्ता नवीन श्रेष्ठ हुन्। उनले यसअघि गत वर्ष ‘लाज शरणम्’ निर्माण गरेका थिए। चलचित्रको निर्मातामा काली रानी श्रेष्ठ छिन्।

‘पाँच पाण्डव’को कथा, पटकथा तथा संवाद सुशील पौडेलले लेखेका हुन्। उनका अनुसार चलचित्रले महाभारतका पाँच पाण्डवका चरित्र र बिम्बलाई आधार बनाएर समकालीन नेपाली समाजको कथा प्रस्तुत गर्नेछ।