काठमाडौं । दुग्ध विकास संस्थान (डीडीसी)ले उत्पादन गरेको घिउ पहिलोपटक दुबई निर्यात भएको छ। रातो र चन्द्र–सूर्य इन्टरनेसनल कम्पनीले डीडीसीको घिउ दुबई लगेको हो।

दुग्ध विकास संस्थानका महाप्रबन्धक डा. शरणकुमार पाण्डेका अनुसार उक्त कम्पनीले वार्षिक न्यूनतम ५० हजार किलो घिउ निर्यात गर्ने गरी डीडीसीसँग सम्झौता गरेको छ। सम्झौताअनुसार पहिलो चरणमा ५ सय किलो घिउ दुबई पठाइएको हो।

दुबईमा डिपार्टमेन्ट स्टोर सञ्चालन

रातो र चन्द्र–सूर्य इन्टरनेसनलले दुबईमा आफ्नो सहायक कम्पनी मातृभूमि जनरल ट्रेडिङ एलएलसीमार्फत डिपार्टमेन्ट स्टोर सञ्चालनको तयारी गरेको छ। सोही स्टोरमा बिक्री गर्न डीडीसीको घिउ दुबई लगिएको बताइएको छ।

कम्पनीले आगामी दिनमा दक्षिण कोरिया र मलेसियामा समेत डीडीसीको घिउ निर्यात गर्ने जानकारी दिएको छ।

प्याकेजिङका कारण ढिलाइ

दुबई निर्यातका लागि केही महिनाअघि नै सम्झौता भए पनि प्याकेजिङलगायतका कामका कारण निर्यातमा समय लागेको डीडीसीले जनाएको छ। हाल डीडीसीले घिउलाई सिसाको बोतलमा प्याकिङ गरेर निर्यात गरेको छ।

पहिलो चरणमा कम्पनीले मूल्य अभिवृद्धि करसहित करिब ६ लाख रुपैयाँ बराबरको घिउ डीडीसीबाट खरिद गरेको छ।

घिउ बिक्रीमा डीडीसी

डीडीसीका अनुसार गत आर्थिक वर्षमा संस्थानले करिब साढे २ सय टन घिउ बिक्री गरेको थियो। दुबईसँगै दक्षिण कोरिया र मलेसियामा समेत निर्यातको सम्भावना बढेपछि डीडीसीको घिउले अन्तर्राष्ट्रिय बजार विस्तार गर्ने अवसर पाउने देखिएको छ।

Originally published on abcnews.com.np.