हेटौँडा । बागमती प्रदेशका नवनियुक्त मुख्यमन्त्री किरण थापा मगरले आगामी आइतबार दिउँसो १ बजे प्रदेश सभाबाट विश्वासको मत लिने भएका छन्।

प्रदेश सभा सचिवालयका अनुसार भदौ ७ गते बस्ने प्रदेश सभा बैठकमा मुख्यमन्त्री थापा मगरले विश्वासको मतसम्बन्धी प्रस्ताव पेस गर्ने तयारी गरिएको छ।

नेकपा एमालेका थापा मगरलाई बिहीबार प्रदेश प्रमुख दीपकप्रसाद देवकोटाले नेपालको संविधानको धारा १६८ को उपधारा (२) बमोजिम मुख्यमन्त्री नियुक्त गरेका थिए। एमाले, नेपाली कम्युनिस्ट पार्टी (नेकपा) र राष्ट्रिय प्रजातन्त्र पार्टी (राप्रपा)का ६३ सांसदको समर्थनमा उनले मुख्यमन्त्री पदमा दाबी पेस गरेका थिए।

३० दिनभित्र विश्वासको मत लिनुपर्ने

संविधानअनुसार धारा १६८ को उपधारा (२) बमोजिम नियुक्त मुख्यमन्त्रीले प्रदेश सभाबाट विश्वासको मत प्राप्त गर्नुपर्ने व्यवस्था छ। मुख्यमन्त्री थापा मगरले नियुक्त भएको मितिले ३० दिनभित्र विश्वासको मत लिनुपर्नेछ।

यसअघि निवर्तमान मुख्यमन्त्री इन्द्रबहादुर बानियाँले विश्वासको मत लिनुअघि नै पदबाट राजीनामा दिएपछि प्रदेश प्रमुखले नयाँ सरकार गठनका लागि आह्वान गरेका थिए।

आइतबार हुने मतदानमा मुख्यमन्त्री थापा मगरले बहुमत सदस्यको समर्थन प्राप्त गरेमा उनको नेतृत्वमा बागमती प्रदेश सरकार औपचारिक रूपमा अघि बढ्नेछ।

Originally published on abcnews.com.np.