काठमाडौं । नेपाली कांग्रेसका सभापति गगन थापाले पार्टीभित्रका असन्तुष्ट नेताहरू एकजुट भएर १५औँ महाधिवेशनमा सहभागी हुन र आफूलाई पराजित गर्न चुनौती दिएका छन्।

असोज १६ गतेदेखि हुने भनिएको १५औँ महाधिवेशनबाट आफूलाई हराएर नेतृत्व परिवर्तन गर्न उनले असन्तुष्ट नेताहरूलाई आग्रह गरेका हुन्।

विशेष महाधिवेशनबाट आफू सभापति बनेकै कारण पार्टीमा अहिलेको अवस्था आएको भन्ने असन्तुष्ट पक्षका नेताहरूको आरोप रहेको उल्लेख गर्दै थापाले त्यसको निर्णय महाधिवेशनबाटै गर्नुपर्ने बताए।

“गगन थापा विशेष महाधिवेशनबाट सभापति भएको हुनाले पार्टीको यो अवस्था भयो भन्ने उहाँहरूको आरोप छ। पार्टीका बहुसंख्यक साथीको विश्वास पनि यही रहेको भन्ने दाबी छ,” थापाले भने, “अहिले सजिलो बाटो छ। सारा नेता एक हुनुभएको छ। भेट्रान नेताहरू सबै त्यहीँ हुनुहुन्छ। शेरबहादुर दाइ पनि त्यहीँ आएर जोडिनुभयो। महाधिवेशनमा आएर मलाई धूलो चटाइदिनुस्। मलाई सरासर हराइदिए भइहाल्यो नि।”

थापाले असोज १६ गते हुने १५औँ महाधिवेशनबाट आफूलाई पराजित गरेर असन्तुष्ट नेताहरूले आफूलाई ‘साइजमा’ ल्याउन सक्ने बताए।

उनले असन्तुष्ट नेताहरूको नियत खराब नभए पनि उनीहरूको राजनीतिक संगति नमिलेको टिप्पणी गरे।

थापाले पार्टीभित्रको विवादको समाधान अदालतबाट नभई महाधिवेशनबाट खोज्नुपर्ने सन्देशसमेत दिएका छन्।

Originally published on abcnews.com.np.