किभ । युक्रेनको मध्यभागमा रहेको सहर क्रिभी रिहको एक किनमेल केन्द्रमा रुसले गरेको ड्रोन आक्रमणमा कम्तीमा १५ जनाको मृत्यु भएको छ भने १३० जना घाइते भएका छन्। घाइतेमध्ये २३ जना बालबालिका रहेको स्थानीय अधिकारीहरूले जनाएका छन्।

आक्रमणपछि किनमेल केन्द्रमा ठूलो आगलागी भएको थियो। उद्धारकर्मीहरूले भग्नावशेष हटाउने र आगो नियन्त्रणमा लिने काम जारी राखेका छन्। घटनास्थलमा अझै मानिस फसेको हुन सक्ने आशंकाका कारण मृतक तथा घाइतेको संख्या बढ्न सक्ने अधिकारीहरूले बताएका छन्।

युक्रेनका राष्ट्रपति भोलोदिमिर जेलेन्स्कीले आफ्नो गृहनगर क्रिभी रिहमा शुक्रबार दुई चरणमा ड्रोन आक्रमण भएको बताएका छन्। उनले घटनालाई अत्यन्तै निन्दनीय र घृणित आक्रमणको संज्ञा दिँदै नागरिक पूर्वाधारमाथि भएको हमलाको कडा आलोचना गरेका छन्।

जेलेन्स्कीका अनुसार पहिलो आक्रमणपछि घटनास्थलमा उद्धार तथा राहत कार्यमा खटिएका सुरक्षाकर्मी र उद्धारकर्मीलाई लक्षित गर्दै दोस्रो पटक पनि ड्रोन प्रहार गरिएको थियो।

निप्रोपेट्रोभस्क क्षेत्रका प्रमुख ओलेक्जेन्डर हान्झाका अनुसार शुक्रबार साँझसम्म मृत्यु हुनेको संख्या १५ पुगेको हो। मृतकमध्ये दुई जनाको अस्पतालमा उपचारका क्रममा मृत्यु भएको बताइएको छ।

अधिकारीहरूका अनुसार आक्रमणमा घाइते भएका १३० जनामध्ये २९ जनाको अवस्था गम्भीर रहेको छ। अस्पतालहरूमा घाइतेहरूको उपचार भइरहेको छ।

घटनास्थलमा खोज तथा उद्धार कार्य जारी रहेकाले भग्नावशेषमुनि थप मानिस भेटिन सक्ने र मृतकको संख्या अझै बढ्न सक्ने आशंका गरिएको छ।

Originally published on abcnews.com.np.