काठमाडौं । टर्कीका राष्ट्रपति रेसेप तैयप एर्दोगानविरुद्ध इजरायलको प्रधानमन्त्री कार्यालयले कडा टिप्पणी गरेको छ । प्रधानमन्त्री बेन्जामिन नेतन्याहुविरुद्ध टर्कीले पक्राउ पुर्जी जारी गरेपछि इजरायलले एर्दोगानमाथि गम्भीर आरोप लगाएको हो ।

गाजामा सहायता सामग्री बोकेका जहाज जफत गरेको आरोपमा टर्कीले नेतन्याहुविरुद्ध पक्राउ पुर्जी जारी गरेको घोषणा गरेको थियो । त्यसको प्रतिक्रियामा शुक्रबार इजरायली प्रधानमन्त्री कार्यालयले सामाजिक सञ्जाल एक्समार्फत एर्दोगानलाई ‘यहुदीविरोधी तानासाह’को संज्ञा दिएको हो ।

विज्ञप्तिमा एर्दोगानमाथि कुर्दमाथि दमन गरेको, हमासका सदस्यलाई आश्रय दिएको, साइप्रसको भूभाग कब्जा गरेको तथा विपक्षी पत्रकार र राजनीतिकर्मीलाई ठूलो संख्यामा जेल हालेको आरोप लगाइएको छ ।

इजरायली प्रधानमन्त्री कार्यालयले एर्दोगानले इजरायलविरुद्धको आफ्नो अभियान सिरियासम्म विस्तार गर्न खोजेको आरोपसमेत लगाएको छ । यस्तो प्रयास आफूहरूलाई स्वीकार्य नहुने भन्दै इजरायली नेता तथा सैनिकलाई धम्क्याउने एर्दोगानको प्रयास सफल नहुने चेतावनीसमेत दिइएको छ ।

बढ्दो तनाव

इजरायल र टर्कीबीच पछिल्लो समय सम्बन्ध थप तनावपूर्ण बन्दै गएको छ । विशेषगरी गाजामा जारी युद्ध र इजरायल–प्यालेस्टाइन द्वन्द्वका विषयमा टर्कीले इजरायलको कडा आलोचना गर्दै आएको छ । टर्कीको पछिल्लो कदमपछि दुई देशबीचको कूटनीतिक तनाव थप चर्किएको हो ।

Originally published on abcnews.com.np.