जनकपुरधाम । जनकपुरधाममा गुठीको अतिक्रमित जग्गा खाली गराउने अभियान शनिबार बिहानदेखि सुरु भएको छ। पहिलो चरणअन्तर्गत गिरनारी कुट्टीनजिक रहेको गोरधोइ पोखरीको अतिक्रमित डिलमा डोजर परिचालन गरी संरचना हटाउन थालिएको हो।

गुठी संस्थान जनकपुरधामले यसअघि अतिक्रमित जग्गा खाली गर्न सार्वजनिक सूचना जारी गरेको थियो। साउन १ गते सूचना प्रकाशित गरेपछि भदौ ५ गते जनकपुर नगर क्षेत्रमा माइकिङसमेत गरेर अतिक्रमण हटाउन पुनः आग्रह गरिएको थियो।

तर, सूचना दिँदासमेत अतिक्रमित संरचना नहटाइएपछि संस्थानले शनिबारदेखि डोजर परिचालन गरी अभियान सुरु गरेको जनाएको छ।

गुठी संस्थान जनकपुरधामका किशोरकुमार झाले पहिलो चरणमा पोखरीका डिलमा भएका अतिक्रमित संरचना हटाउने काम सुरु गरिएको बताए। उनका अनुसार जनकपुरधाम क्षेत्रमा रहेका करिब ५० वटा पोखरीमध्ये पहिलो चरणमा सातवटा पोखरीलाई अतिक्रमणमुक्त गराउने योजना बनाइएको छ।

ठूलो संख्यामा सुरक्षाकर्मी परिचालन

अतिक्रमित संरचना हटाउने क्रममा सम्भावित अवरोध र अप्रिय घटना हुन नदिन ठूलो संख्यामा सुरक्षाकर्मी परिचालन गरिएको थियो। सुरक्षाकर्मीको उपस्थितिमा डोजर प्रयोग गरेर गोरधोइ पोखरीको डिलमा बनेका संरचना हटाउने काम सुरु गरिएको हो।

गुठी संस्थानले चरणबद्ध रूपमा जनकपुरधाम क्षेत्रका अतिक्रमित पोखरी, मन्दिर परिसर तथा अन्य गुठी जग्गा खाली गराउने तयारी गरेको जनाएको छ।

पहिलो चरणमा सात पोखरी अतिक्रमणमुक्त गर्ने तयारी

जनकपुरधामका करिब ५० वटा पोखरीमध्ये अतिक्रमणको अवस्थाका आधारमा पहिलो चरणमा सातवटा पोखरीलाई अतिक्रमणमुक्त गर्ने कार्ययोजना बनाइएको छ। गोरधोइ पोखरीबाट सुरु गरिएको अभियानलाई अन्य अतिक्रमित पोखरीसम्म विस्तार गरिने गुठी संस्थानले जनाएको छ।

गुठीको सार्वजनिक सम्पत्ति संरक्षण र अतिक्रमित क्षेत्रलाई पुनः सार्वजनिक उपयोगमा ल्याउने उद्देश्यसहित यो अभियान सञ्चालन गरिएको हो।

Originally published on abcnews.com.np.