काठमाडौं । नेकपा (एमाले) का महासचिव शंकर पोखरेलले पार्टी अध्यक्ष केपी शर्मा ओलीलाई पदबाट हटाउने कुनै योजना आफूहरूलाई नभएको स्पष्ट पारेका छन् । शनिबार भदौ ६ गते विराटनगरमा प्रेस चौतारी मोरङले आयोजना गरेको पत्रकार सम्मेलनमा बोल्दै उनले, आफूहरू अहिले पार्टीलाई पुरानै अवस्थामा फर्काउन पुनर्गठनको प्रक्रियामा रहेको र ओलीलाई अध्यक्षबाट हटाउने पक्षमा नरहेको बताए ।

पार्टी नेतृत्व परिवर्तन सामाजिक सञ्जालमा हुने बहस, सार्वजनिक टीकाटिप्पणी वा बाहिरी छलफलबाट नहुने पनि उनले उल्लेख गरे । एमालेको महाधिवेशन कहिले हुन्छ भन्ने निर्णय गर्ने पूर्ण अधिकार पार्टीको केन्द्रीय कमिटीसँग मात्र रहेको महासचिव पोखरेलले बताए ।

पार्टीमा रूपान्तरण आवश्यक रहेको स्वीकार गर्दै उनले, जनतासँगको सम्बन्ध पुनः जोड्न र कार्यकर्ताको मनोबल बढाउन पार्टीभित्र छलफल भइरहेको जानकारी दिए । यस प्रयोजनका लागि कार्यदल पनि गठन गरिएको छ ।

सहकार्यको प्रयास

महासचिव पोखरेलले लोकतन्त्र र संविधानको रक्षाका निम्ति संसद्भित्र तथा बाहिर रहेका दलहरूसँग सहकार्यको प्रयास भइरहेको बताए ।

प्रधानमन्त्री वालेन्द्र शाह (बालेन) को स्वेच्छाचारी र अधिनायकवादी कार्यशैलीलाई रोकी लोकतन्त्रलाई सही मार्गमा ल्याउन राष्ट्रपतिसँग पनि संवाद गरिने उनले उल्लेख गरे । प्रधानमन्त्रीले संसदीय लोकतन्त्रका आधारभूत स्तम्भहरूको उपेक्षा गरेको र संसद्प्रति उत्तरदायी नबनेको पनि उनले बताए ।

Originally published on abcnews.com.np.