काठमाडौं । नेपाल प्रिमियर लिग (एनपीएल) को तेस्रो संस्करणका लागि चितवन राइनोजले जिम्बाब्वेका अनुभवी स्टार अलराउन्डर सिकन्दर राजालाई टोलीमा अनुबन्ध गरेको छ।

क्लबले सामाजिक सञ्जालमार्फत सिकन्दर राजालाई टोलीमा भित्र्याइएको जानकारी सार्वजनिक गरेको हो। अन्तर्राष्ट्रिय क्रिकेटमा अनुभवी अलराउन्डरका रूपमा परिचित राजाको आगमनसँगै चितवन राइनोजले आगामी सिजनका लागि आफ्नो टोली थप सशक्त बनाउने अपेक्षा गरिएको छ।

सिकन्दर राजा नेपाली फ्रेन्चाइज क्रिकेटसँग पनि परिचित खेलाडी हुन्। उनले यसअघि सन् २०२१ मा आयोजना भएको एभरेस्ट प्रिमियर लिग (ईपीएल) मा विराटनगर वारियर्सबाट खेलिसकेका छन्। त्यसैले नेपाली क्रिकेटको वातावरण र यहाँको फ्रेन्चाइज प्रतियोगिताको अनुभवसमेत उनीसँग रहेको छ।

राजाले टी–२० अन्तर्राष्ट्रिय क्रिकेटमा जिम्बाब्वेको प्रतिनिधित्व गर्दै १३३ खेल खेलिसकेका छन्। उनले यस अवधिमा ३ हजार ८९ रन बनाउनुका साथै १०७ विकेट लिएका छन्। ब्याटिङ र बलिङ दुवै क्षेत्रमा योगदान दिन सक्ने भएकाले उनी चितवन राइनोजका लागि महत्वपूर्ण विदेशी खेलाडी बन्न सक्ने अपेक्षा गरिएको छ।

चितवन राइनोजले सिकन्दर राजालाई अनुबन्ध गरेसँगै तेस्रो सिजनका लागि आफ्नो विदेशी खेलाडीको सूची थप बलियो बनाएको छ। उनी टोलीमा अनुबन्ध हुने दोस्रो विदेशी खेलाडी हुन्। यसअघि क्लबले इंग्ल्यान्डका अनुभवी क्रिकेटर रवि बोपारालाई निरन्तरता दिइसकेको छ।

एनपीएलको तेस्रो संस्करण आगामी कात्तिक ९ गतेदेखि मंसिर ५ गतेसम्म सञ्चालन हुने तालिका छ। प्रतियोगिताका लागि फ्रेन्चाइज टोलीहरूले स्वदेशी तथा विदेशी खेलाडीको संयोजनसहित आफ्नो तयारीलाई तीव्र बनाइरहेका छन्।

Originally published on abcnews.com.np.