मुक्तिनाथ । प्रधानमन्त्री बालेन्द्र शाह आइतबार बिहान ९ः५० बजे मुस्ताङबाट काठमाडौँ फर्किएका छन्। शनिबार राति पवित्र धार्मिकस्थल मुक्तिनाथ मन्दिरको दर्शनका लागि पुगेका प्रधानमन्त्री शाह एक रात मुस्ताङमा बसेर काठमाडौँ फर्किएका हुन्।

मुस्ताङ भ्रमणका क्रममा प्रधानमन्त्री शाह घरपझोङ गाउँपालिका–३, जोमसोम बजारस्थित मुस्ताङी तथा थकाली मौलिक संस्कृति झल्किने परम्परागत वास्तुकलामा निर्मित होटल ओम्स होममा बसेका थिए। विष्णु राज र उनकी श्रीमती लालकुमारी हिराचनले पाँच दशकअघिदेखि सञ्चालन गर्दै आएको उक्त होटलमा प्रधानमन्त्री शाहले एक रात बिताएका थिए।

परिवारसहित मुक्तिनाथ पुगेका प्रधानमन्त्री शाहले शनिबार साँझ मन्दिरमा पूजाअर्चना गरेका थिए। उनले मुक्तिनाथ मन्दिरका पुजारी कृष्णप्रसाद सुवेदीबाट टीका तथा प्रसाद ग्रहण गरेका थिए।

पूजाअर्चना सकेर प्रधानमन्त्री शाह शनिबार राति करिब ८ः४५ बजे मुक्तिनाथ मन्दिरबाट फर्किएका थिए। त्यसपछि उनी कालीगण्डकी करिडोरअन्तर्गत बेनी–जोमसोम सडकखण्ड हुँदै जोमसोम पुगेका थिए।

प्रधानमन्त्री शाहको भ्रमणलाई ध्यानमा राख्दै म्याग्दी क्षेत्रमा जिल्ला प्रशासन कार्यालयले आवश्यक सुरक्षा व्यवस्था सुदृढ पारेको थियो।

स्रोतका अनुसार प्रधानमन्त्री शाहको मुस्ताङ भ्रमण पारिवारिक रहेको थियो। भ्रमणका क्रममा कुनै अतिरिक्त औपचारिक कार्यक्रम भने राखिएको थिएन।

Originally published on abcnews.com.np.