काठमाडौं । रसुवाको भोटेकोशी बाढीपछि उद्धार तथा राहत कार्यमा सहयोग पुर्याउन आवश्यक उपकरणसहित अमेरिकी सेनाका दुईवटा विमान नेपाल आइपुगेका छन् ।
नेपाल सरकारको नेतृत्वमा भइरहेको उद्धार तथा राहत अभियानलाई सहयोग पुग्ने गरी साना लोडरसहितका आवश्यक उपकरण र सामग्री लिएर अमेरिकी सेनाका विमान नेपाल आएका हुन् ।
अमेरिकी राजदूतावासका अनुसार भदौ १० गते रसुवामा आएको विनाशकारी बाढीपछि उद्धार तथा राहत कार्यमा प्रयोग गर्न ५ हजारभन्दा बढी विशिष्टीकृत सामग्री ल्याइएको छ । त्यस्तै, ५ सय प्राथमिक उपचार किट र स्ट्रेचरसमेत सामग्रीमा समावेश छन् ।
नेपाल सरकारले सहयोगका लागि अनुरोध गरेपछि ती सामग्री नेपाल ल्याइएको दूतावासले जनाएको छ । यसअघि पनि अमेरिकाले करिब ३६ लाख अमेरिकी डलर बराबरका राहत तथा उद्धार सामग्री नेपाल ल्याइसकेको जनाएको छ ।
अमेरिकी राजदूतावासले नेपाललाई उपलब्ध गराइएको सहयोगले विपद्का बेला अमेरिका–नेपाल साझेदारीलाई थप बलियो बनाउने उल्लेख गरेको छ ।
रसुवाको भोटेकोशी बाढीपछि जलविद्युत् आयोजनाका सुरुङ तथा अन्य संरचनामा ठूलो संख्यामा मानिस फसेको आशंका गरिएको छ । पर्याप्त प्रविधि, उपकरण र पहुँचको अभावमा बाढी आएको ८ दिन बितिसक्दा समेत सुरुङभित्र फसेकाहरूको उद्धार हुन सकेको छैन ।
विशेषगरी सुरुङभित्र जमेको पानी, लेदो र संरचनागत जोखिमका कारण उद्धार टोलीलाई प्रभावित क्षेत्रमा प्रवेश गर्न कठिन भइरहेको छ ।
अमेरिकी सेनाका विमानबाट ल्याइएका लोडर, उद्धार उपकरण तथा अन्य सामग्रीले प्रभावित क्षेत्रमा लेदो तथा भग्नावशेष हटाउने र उद्धार कार्यलाई थप प्रभावकारी बनाउन सहयोग पुग्ने अपेक्षा गरिएको छ ।
Originally published on abcnews.com.np.
प्रतिक्रिया दिनुहोस्