काठमाडौं । सर्वोच्च अदालतले व्यवसायी रोहित गुप्तालाई २ करोड रुपैयाँ धरौटीमा रिहा गर्न आदेश दिएको छ।

सर्वोच्च अदालतका न्यायाधीश हरिप्रसाद फुयाल र श्रीकान्त पौडेलको संयुक्त इजलासले बुधबार सम्पत्ति शुद्धीकरणसम्बन्धी मुद्दामा गुप्तालाई धरौटीमा रिहा गर्न आदेश दिएको हो।

उही मुद्दामा हिमालयन रिइन्स्योरेन्स कम्पनीका अध्यक्ष शेखर गोल्छा र सञ्चालक समिति सदस्य शुभेच्छा खरेल धरौटी बुझाएर रिहा भइसकेको भन्दै गुप्तालाई थुनामा राख्नु उचित नदेखिएको सर्वोच्चको आदेशमा उल्लेख छ।

गुप्ताको संलग्नताको तह र हद हेर्दा उनलाई थुनामै राखेर मुद्दाको कारबाही अघि बढाउनुपर्ने अवस्था नदेखिएको सर्वोच्चले जनाएको छ।

यसअघि साउन २८ गते विशेष अदालतका न्यायाधीश नारायणप्रसाद पौडेल र उमेश कोइरालाको इजलासले गुप्तालाई पुर्पक्षका लागि थुनामा पठाउने आदेश दिएको थियो।

Originally published on abcnews.com.np.