काठमाडौँ । श्रम संस्कृति पार्टीका वरिष्ठ नेता सुदन किरातीले पूर्वसहकर्मी तथा नेकपा (माओवादी केन्द्र) का नेता–कार्यकर्ताले सामाजिक सञ्जालमार्फत आफूविरुद्ध गरिरहेको आलोचनाको जवाफ दिएका छन्।

मोरङमा आयोजित कार्यक्रममा बोल्दै किरातीले देशको हित हुन्छ भने आफू जस्तोसुकै आलोचना सहन तयार रहेको बताए। उनले आफूले प्रचण्ड नेतृत्वको पार्टी छाडेपछि सामाजिक सञ्जालमा विभिन्न टिप्पणी भइरहेको बताए।

“धेरै साथीहरूले फेसबुकमा लेख्छन्, प्रचण्डको पार्टीमा बस्दा त प्रश्न गर्न दिन्न भन्थ्यो सुदन किराती । अहिले त आफैँ पो मर्यो कि क्या हो ? भन्छन् । मेरो सराद्ध दिनैपिच्छे भइराखेको छ उता । मैले सहँदा देशको हितमा हुन्छ भने म जति पनि सहन तयार छु,” उनले भने।

किरातीले आफूले लगाउने पोसाक र पार्टीले गाउने गीतलाई लिएर समेत सामाजिक सञ्जालमा टिप्पणी हुने गरेको बताए। आफूलाई ‘अब गीत कण्ठ भयो ?’ भन्दै इनबक्समा समेत सन्देश आउने गरेको उनले सुनाए।

आफूहरूले गाउने गीतमा देश, श्रम र स्वाभिमानको भावना रहेको उनको भनाइ थियो। उनले आफू आबद्ध पार्टीमा कुनै व्यक्ति वा परिवारको स्तुतिगान गर्ने गीत नरहेको बताए।

“हट्ने होइन डटी लड्ने नेपालीको बानी हुन्छ, कहिल्यै नझुक्ने शिर उभिएको स्वाभिमानी नेपाली हुन्छ ठिक छ। तर त्यहाँ सिङ्गो नेपाल हुन्छ, त्यहाँ राजा–रानी हुन्छ भन्ने गीत छैन यहाँ,” उनले भने।

उनले आफूहरूको पार्टीमा राजतन्त्र वा परिवारतन्त्रको स्तुतिगान गर्ने गीत नरहेको टिप्पणी गरे।

“श्रीमान् गम्भीर नेपाली प्रचण्ड प्रतापी भूपति, श्री ५ सरकार महाराजाधिराजको सदा रहोस् उन्नति भन्ने गीत छैन यहाँ। कुनै परिवार र परिवारतन्त्रको स्तुतिगान छैन यहाँ,” किरातीले भने।

‘इन्जिन चुँडिएको रेलको डब्बामा बसेर इनबक्स नगर्नुहोस्’

किरातीले आफूहरूमाथि आलोचना गर्ने पूर्वसहकर्मीहरूलाई श्रम संस्कृति पार्टीमा आउनसमेत आग्रह गरे। आफूहरूले उनीहरूलाई स्वागत गर्ने उनको भनाइ थियो।

“तपाईं बरु सक्नुहुन्छ भने आउनुहोस्, तपाईंहरूलाई हाम्रो पार्टीमा फूलमालाले नसके पनि माटोको टीका लगाएर स्वागत गर्नेछौँ,” उनले भने।

उनले प्रचण्ड नेतृत्वको पार्टीप्रति कटाक्ष गर्दै पूर्वसहकर्मीहरूलाई सामाजिक सञ्जालमार्फत आफूहरूलाई आलोचना नगर्न आग्रह गरे।

“इन्जिन चुँडिएको रेलको डब्बामा बसेर हामीलाई इनबक्स नगर्नुहोस्। कृपया, समयले तपाईंलाई छोडिसकेको छ,” किरातीले भने।

Originally published on abcnews.com.np.