लस एन्जलस । विश्वप्रसिद्ध फुटबल खेलाडी लियोनल मेसी विपक्षी खेलाडीमाथि हात उठाएको आरोपमा कारबाहीमा परेका छन्। मेजर लिग सकर (एमएलएस)को अनुशासन समितिले खेल भावना विपरीत कार्य गरेको भन्दै मेसीलाई जरिवाना गर्ने निर्णय गरेको हो।

बुधबार राति इन्टर मियामी र फिलाडेल्फिया युनियनबीच भएको तनावपूर्ण खेलका क्रममा घटना भएको थियो। खेलको १०१औँ मिनेटमा फिलाडेल्फियाका खेलाडी क्विन सुलिभानले आफूलाई कुहिनोले प्रहार गरेको दाबी गरेपछि मेसी आक्रोशित भएका थिए।

सोही क्रममा मेसीले सुलिभानको टाउकोको पछाडिपट्टि र घाँटीको क्षेत्रमा खुला हातले प्रहार गरेको भिडियोमा देखिएको थियो।

मैदानका मुख्य रेफ्री फिलिप डुजिकको ध्यान अन्यत्र रहेकाले उनले घटनालाई तत्काल देखेनन् र मेसीले त्यसबेला कुनै कार्ड पाएनन्। तर, खेलपछि भिडियो समीक्षा तथा अनुशासन समितिको छानबिनपछि मेसीलाई दोषी ठहर गरिएको हो।

नियम उल्लङ्घनमा जरिवाना

एमएलएसको नियमअनुसार विपक्षी खेलाडीको अनुहार, टाउको वा घाँटीमा जानाजानी हात पुर्‍याउनु गम्भीर नियम उल्लङ्घन मानिन्छ। यही प्रावधानअन्तर्गत मेसीलाई जरिवाना गरिएको हो। यद्यपि, अनुशासन समितिले जरिवानाको रकम सार्वजनिक गरेको छैन।

तनावपूर्ण बनेको खेल २–२ गोलको बराबरीमा सकिएको थियो। इन्टर मियामीका लागि मेसीले एक गोल गरेका थिए।

केही समयअघि आफ्ना बुबा जोर्गे मेसीको निधनपछि मैदान फर्किएका मेसीले उक्त गोल आफ्ना दिवंगत बुबाप्रति समर्पित गरेका थिए।

खेलको अन्तिम समयमा तनाव थप बढेपछि दुवै टोलीका एक–एक खेलाडीले रातो कार्डसमेत पाएका थिए।

Originally published on abcnews.com.np.