काठमाडौं । जापानको आइची/नागोयामा हुने २०औँ एसियाली खेलकुदमा नेपालले स्वर्णसहित दोहोरो अंकमा पदक जित्ने लक्ष्यका साथ करिब तीन वर्षदेखि मिसन–२०२६ अन्तर्गत प्रशिक्षण गरिरहेको छ । सोही उद्देश्यले २२ खेलमा १३७ खेलाडी— ८० पुरुष र ५७ महिला गरी जापानको यात्रा तय गर्दै छन्, जसमा ३२ प्रशिक्षक पनि सहभागी हुनेछन् ।

चीनको हाङझाउमा भएको १९औँ एसियाली खेलकुदमा नेपालबाट २९ खेलमा २५३ जना खेलाडी (१२६ पुरुष र १२७ महिला) सहभागि भएका थिए। नेपालले सन् १९८६ देखि एसियाली खेलकुदमा सहभागिता जनाउन थालेको हो, तर चार दशकको अवधिमा पनि दोहोरो अंकको पदकसम्म पुग्न सकेको छैन ।

नेपालले पहिलो पटक एसियाली खेलकुदमा भाग लिएको सन् १९८६ मा आठवटा कांस्यपदक जितेको थियो— जुन नेपालको सबैभन्दा उत्कृष्ट प्रदर्शन हो। त्यसबेला बक्सिङ र तेक्वान्दोबाट चार–चार कांस्य पदक प्राप्त भएको थियो । समग्रमा, नेपालले हालसम्म तीन रजत र २३ कांस्य गरी कुल २६ पदक जितेको छ।

पदक तालिका

हालसम्म तेक्वान्दोले सबैभन्दा बढी १ रजत र १३ कांस्य गरी १४ पदक जितेको छ। यसैगरी, बक्सिङले ६ कांस्य, कराँतेले १ रजत र ३ कास्य, पुरुष प्याराग्लाइडिङ टोलीले १ रजत तथा महिला कबड्डी टोलीले १ कास्य पदक जितेका छन् । तेक्वान्दोकी सविता राजभण्डारीले सन् १९९८, प्याराग्लाइडिङ टिमले २०१८ र कराँतेकी एरिका गुरुङले सन् २०२३ मा नेपाललाई रजतपदक दिलाएका थिए।

रजत पदक विजेताहरू

सविता राजभण्डारी तेक्वान्दोमा नेपालको लागि पहिलो रजतपदक विजेता बनिन् । उनले सन् १९९८ को १३औँ एसियाली खेलकुदमा थाइल्यान्डमा महिला फेदरवेट ५५ केजीमुनिमा रजतपदक जितेकी थिइन्। फाइनलमा उनी चाइनिज ताइपेइकी हसु चि लिङ्गसँग पराजित भएकी थिइन् ।

दोस्रो रजतपदक प्याराग्लाइडिङ टोलीले जितेको थियो। सन् २०१८ को इन्डोनेशियाको एसियाली खेलकुदअन्तर्गत क्रस कन्ट्री इभेन्टमा नेपालको पुरुष टोलीले रजतपदक प्राप्त गरेको हो, जसमा विमल अधिकारी, विजय गौतम, सुशिल गुरुङ, युकेश गुरुङ र विशाल थापा सहभागी थिए। नेपाली टोली जापानभन्दा केही अंकले पछि परेको थियो । नेपालले ११ हजार ३६४ अंक प्राप्त गर्दा जापानले ११ हजार ३९१ अंक हासिल गरेको थियो।

त्यस्तै, कराँते स्टार एरिका गुरुङले चीनको हाङझाउमा भएको पछिल्लो एसियाली खेलकुदमा २४ वर्षपछि नेपाललाई व्यक्तिगत रजतपदक दिलाएकी थिइन् । कुमुतेको महिला ६८ केजीमाथिको स्पर्धामा काजकिस्तानकी सोफिया बेरुल्टसेभासँग ३–० ले पराजित हुँदा एरिकाको स्वर्णपदक जितेको सपना अधुरै रह्यो। यसअघि उनले जापानकी युजुकी सवाइ र हङकङकी हो काइ याङलाई हराएकी थिइन् ।

Originally published on abcnews.com.np.