काठमाडौं । गायक सुरेश शाहीको स्वरमा तीज गीत ‘आँशु बरर…’ सार्वजनिक भएको छ । गीतमा नेपाली महिलाका दैनिक भोगाइ, पारिवारिक सम्बन्ध, बेरोजगारीदेखि सामाजिक तथा आर्थिक समस्यासम्मका विषय समेटिएका छन् ।

गायक शाहीको युट्युब च्यानलमार्फत आइतबार सार्वजनिक गीतमा नवोदित गायिका विनूशा राईको पनि स्वर रहेको छ । सुमित्रा खड्काको शब्द रहेको गीतको म्युजिक भिडियोमा सुरेश शाही, सुमित्रा खड्का, सुदीपा पाठक र विक्की विश्वकर्माले अभिनय गरेका छन् ।

म्युजिक भिडियोको निर्देशन शेर शाहीले गरेका हुन् ।

गीतमा सुनको बढ्दो मूल्य, सासू–बुहारी तथा नन्द–भाउजूको सम्बन्ध, विदेशिएका जेठाजु र देवरका कथालगायत नेपाली समाजका पारिवारिक र सामाजिक विषयलाई प्रस्तुत गरिएको छ ।

रचनाकार सुमित्रा खड्काले यस वर्षको तीजमा ‘आँशु बरर…’ ले दर्शक तथा श्रोतामाझ मनोरञ्जनसँगै सामाजिक विषयवस्तु पनि प्रस्तुत गर्ने विश्वास व्यक्त गरेकी छन् ।

Originally published on abcnews.com.np.