काठमाडौँ । अभिनेत्री नीता ढुंगानाको लेखन तथा निर्देशन रहेको फिल्म ‘पार्वती’को अन्तर्राष्ट्रिय प्रदर्शन अधिकार बिक्री भएको छ । नेपालमा प्रदर्शनको तयारी अन्तिम चरणमा पुगेसँगै फिल्मको अमेरिका र अस्ट्रेलिया प्रदर्शन अधिकार बिक्री भएको निर्माण पक्षले जनाएको छ ।

निर्माण पक्षका अनुसार यसै साता अस्ट्रेलिया र अमेरिकाका लागि फिल्मको प्रदर्शन अधिकार बिक्री भएको हो । नमस्ते इन्टरटेन्मेन्टले अस्ट्रेलियामा आगामी ४ सेप्टेम्बरदेखि ‘पार्वती’ प्रदर्शन गर्नेछ ।

त्यसको एक सातापछि अर्थात् ११ सेप्टेम्बरदेखि माया डिजिटल यूएसएले अमेरिकाका सिनेमा हलमा फिल्म प्रदर्शन गर्नेछ ।

फिल्ममा निर्देशक नीता ढुंगाना स्वयं मुख्य भूमिकामा छन् । उनीसँगै अशोक दर्जी, दीपाश्री निरौला, सिरु विष्ट, राधिका कँडेल, राज पंगेनी शर्मा, राजेन्द्र नेपाली, आशा पौडेल र दिप्त प्रकाश अधिकारीलगायत कलाकारको अभिनय छ ।

शिवम् अधिकारीको पटकथा रहेको फिल्मको छायांकन सुदीप बरालले गरेका हुन् । शंकर पाण्डे कार्यकारी निर्माता तथा प्रोडक्सन म्यानेजर रहेको फिल्मका निर्माता हरिहर अधिकारी हुन् ।

‘पार्वती’ यही भदौ १२ गते शुक्रबारदेखि नेपालका हलमा प्रदर्शन हुँदै छ ।

Originally published on abcnews.com.np.