राजबिराज : सप्तरी जिल्लामा सौताबिचको विवादका कारण दुई वर्षीय बालिकाको मृत्यु भएको प्रहरीले जनाएको छ। शम्भुनाथ नगरपालिका–३ की खुशी खातुनको शव आइतबार बिहान घरपछाडिको झाडीमा फेला परेको थियो। घटनाअघि उनी हराएकी थिइन्।

प्रहरीका अनुसार, बालिकाको हत्या उनकी कान्छीआमा मुस्कान खातुनले गरेको हो। सप्तरीका प्रहरी प्रमुख एसपी रुपेश खड्काले १९ वर्षीया मुस्कानलाई पक्राउ गरी अनुसन्धान सुरु गरिएको जानकारी दिए। मुस्कानले बालिकाको घाँटी थिचेर हत्या गरेको स्वीकार गरेकी छन्। प्रहरीले बालिकाको शरीरमा अन्य चोटपटक नदेखिएको बताएको छ।

खुशीकी आमा रुविना खातुन र कान्छीआमा मुस्कानबीच पटक पटक विवाद हुने गरेको स्थानीयवासीले प्रहरीलाई जानकारी दिएका छन्। शनिबार पनि उनीहरूबीच झगडा भएको थियो। रुविनाको विवाह ७ वर्षअघि मोहमद इरफासँग भएको हो, जबकि मुस्कान एक वर्ष पहिले आएकी थिइन्। मोहमद रोजगारीको लागि कतारमा छन्। उनी कान्छी श्रीमतीलाई लिएर विदेश गएका थिए। मुस्कान सोही गाउँमा डेरा लिएर बस्दै आएकी थिइन्। स्थानीयवासीले जेठीआमा रुविना बीचबीचमा त्यहाँ जाने र झगडा गर्ने गरेको प्रहरीलाई बताएका हुन्। बालिकाको शव गजेन्द्रनारायण सिंह अस्पताल राजविराजमा राखिएको छ। प्रहरीले थप अनुसन्धान जारी रहेको जनाएको छ।

Originally published on abcnews.com.np.