जनकपुरधाम । सप्तरीको शम्भुनाथ नगरपालिका–३, ट्राफिक चोकमा दुई वर्षीया बालिका मृत अवस्थामा फेला परेकी छन्।

मोहम्मद इरफानकी दुई वर्षीया छोरी खुशी खातुन सोमबार बिहानदेखि हराएकी थिइन्। परिवारले बालिका हराएको जानकारी प्रहरीलाई गराएपछि खोजतलास सुरु गरिएको थियो।

खोजीका क्रममा प्रहरी टोलीले खुशीलाई आफ्नै घरपछाडिको झाडीमा मृत अवस्थामा फेला पारेको जनाएको छ।

घटनाको अनुसन्धानका क्रममा प्रहरीले घरकै एक व्यक्तिलाई नियन्त्रणमा लिएको छ। ती व्यक्तिको हाउभाउ र गतिविधि शंकास्पद देखिएपछि नियन्त्रणमा लिएर सोधपुछ भइरहेको स्रोतले जनाएको छ।

बालिकाको मृत्यु के कारणले भयो भन्ने विषय भने अहिलेसम्म खुल्न सकेको छैन।

घटनाबारे अनुसन्धानका लागि जिल्ला प्रहरी कार्यालय सप्तरीका प्रमुख प्रहरी उपरीक्षक रुपक खड्कासहितको टोली घटनास्थल पुगेको छ। प्रहरीले घटनास्थलको मुचुल्का तयार गर्ने तथा आवश्यक प्रमाण संकलन गर्ने काम गरिरहेको जनाएको छ।

प्रहरीले नियन्त्रणमा लिइएको व्यक्तिमाथि समेत सोधपुछ जारी राखेको छ भने बालिकाको मृत्युको कारणबारे विस्तृत अनुसन्धान भइरहेको छ।

Originally published on abcnews.com.np.