चितवन । आफ्नै १९ वर्षीया छोरीमाथि जबरजस्ती करणी गरेको आरोपमा चितवन प्रहरीले एक ४५ वर्षीय पुरुषलाई पक्राउ गरेको छ।

जिल्ला प्रहरी कार्यालय चितवनका निमित्त सूचना अधिकारी प्रहरी निरीक्षक मनिष श्रेष्ठका अनुसार पीडित युवती स्वयं प्रहरी कार्यालयमा पुगेर बाबुविरुद्ध जबरजस्ती करणीको जाहेरी दिएपछि प्रहरीले उनलाई नियन्त्रणमा लिएको हो।

प्रहरीका अनुसार पक्राउ परेका व्यक्ति परिवारका अन्य सदस्यसँग जापानमा बस्दै आएका थिए। उनकी श्रीमती र छोरा जापानमै रहेका बेला उनी भने करिब आठ महिनाअघि नेपाल आएका थिए। नेपालमा रहेकी छोरीको स्वास्थ्यमा समस्या देखिएपछि उपचारका लागि आएको प्रारम्भिक जानकारी प्रहरीलाई प्राप्त भएको छ।

बाबु–छोरी मात्रै घरमा रहेको प्रहरीको भनाइ

अनुसन्धानका क्रममा घटनाका बेला बाबु र छोरी मात्रै घरमा बस्दै आएको खुलेको प्रहरीले जनाएको छ। पीडितले दिएको जाहेरीअनुसार गत साउन २८ गते मदिरा सेवन गरेका बाबुले धम्की दिँदै आफूमाथि जबरजस्ती करणी गरेको आरोप लगाएकी छन्।

घटनापछि पीडित युवतीले प्रहरीसमक्ष जाहेरी दिएकी थिइन्। जाहेरीका आधारमा प्रहरीले भदौ ४ गते आरोपित पुरुषलाई नियन्त्रणमा लिएको जनाएको छ।

प्रहरी निरीक्षक श्रेष्ठका अनुसार आरोपितमाथि जबरजस्ती करणीसम्बन्धी कसुरमा अनुसन्धान प्रक्रिया अघि बढाइएको छ। अदालतबाट म्याद थप गरी घटनाको थप अनुसन्धान भइरहेको प्रहरीले जनाएको छ।

प्रहरीले अनुसन्धान पूरा नभएसम्म घटनासँग सम्बन्धित अन्य विवरण सार्वजनिक गर्न नमिल्ने जनाएको छ। आरोप पुष्टि भएमा प्रचलित कानुनअनुसार कारबाही प्रक्रिया अघि बढाइनेछ।

Originally published on abcnews.com.np.