बाँके । राप्ती सोनारी गाउँपालिकाले प्राकृतिक विपद्का बेला समुदायस्तरमै खोज तथा उद्धारमा खटिन सक्ने ४९ जना स्वयंसेवक तयार गरेको छ।

बाढी, डुबान, आगलागी, भूकम्पलगायत विपद्का घटनामा बाहिरबाट उद्धार टोली पुग्न समय लाग्ने भएकाले तत्काल उद्धारका लागि स्थानीय जनशक्ति तयार गरिएको गाउँपालिकाले जनाएको छ।

गाउँपालिका अध्यक्ष तप्त पौडेलका अनुसार पालिकाका सबै वडालाई लक्षित गरी स्वयंसेवक तयार पारिएको हो। उद्धार टोली पुग्न ढिलाइ हुँदा घाइते तथा बेपत्ताको अवस्था थप जोखिमपूर्ण बन्न सक्ने भएकाले समुदायमै आवश्यक सीप भएको जनशक्ति तयार गरिएको उनले बताए।

“प्राकृतिक विपद् पर्नासाथ सुरक्षाकर्मी नपुग्दासम्म समुदायमा के–कसो गर्ने भन्ने अन्योल हुने गरेको थियो। अब त्यस्तो अवस्था आउने छैन,” अध्यक्ष पौडेलले भने, “बाढीमा फसेकाको उद्धारदेखि आगलागी नियन्त्रण र घाइतेलाई प्राथमिक उपचार दिने सीपसहित विपद् व्यवस्थापन स्वयंसेवक तयार भएका छन्।”

गाउँपालिकाले सशस्त्र प्रहरी बलको ४२ नम्बर रिजर्व गण शम्शेरगञ्जसँगको साझेदारी तथा समन्वयमा १८ दिने तालिम सञ्चालन गरेको थियो। तालिमपछि सहभागीलाई पालिकास्तरीय विपद् व्यवस्थापन स्वयंसेवकका रूपमा परिचालन गरिएको हो।

सशस्त्र प्रहरी बलको ४२ नम्बर रिजर्व गण शम्शेरगञ्जका प्रमुख सशस्त्र प्रहरी उपरीक्षक श्याम रावतका अनुसार तालिममा विपद् व्यवस्थापनसम्बन्धी सैद्धान्तिक जानकारीसँगै सम्भावित विपद्का बेला तत्काल घटनास्थलमा पुगेर उद्धार गर्ने व्यावहारिक अभ्याससमेत गराइएको थियो।

राप्ती सोनारी–२ की तालिमप्राप्त स्वयंसेवक रती वलीले तालिमपछि उद्धारसम्बन्धी सैद्धान्तिक तथा व्यावहारिक सीप हासिल भएको बताइन्। विपद् पर्दा समुदायमै तत्काल उद्धार तथा सहयोगका लागि खटिन आफू तयार रहेको उनको भनाइ छ।

Originally published on abcnews.com.np.