काठमाडौं । काठमाडौंको शंखमुलस्थित भ्याली ब्वाइज होस्टेलमा धारिलो हतियार प्रहार गरी युवकको हत्या गरेको आरोपमा प्रहरीले थप दुई जनालाई पक्राउ गरेको छ।

पक्राउ पर्नेमा बारा, कलैया उपमहानगरपालिका–३ का १९ वर्षीय प्रमित पटेल र महोत्तरी, लोहरपट्टी नगरपालिका–६ का २३ वर्षीय आलोक ठाकुर रहेका छन्। दुवै जना सोही होस्टेलमा बस्दै आएका थिए।

प्रहरीका अनुसार पटेललाई जिल्ला प्रहरी कार्यालय मकवानपुरको समन्वयमा भैँसेबाट र ठाकुरलाई काठमाडौंको बुद्धनगरबाट पक्राउ गरिएको हो। यसअघि प्रहरीले होस्टेलमै बस्ने कलैया–३ का १९ वर्षीय शेखर यादवलाई पक्राउ गरेको थियो।

शुक्रबार बिहान करिब १० बजे होस्टेलको कोठा नम्बर १०९ मा २२ वर्षीय बसन्त कालाथोकी धारिलो हतियार प्रहारबाट गम्भीर घाइते अवस्थामा फेला परेका थिए। उनलाई तत्काल निजामती कर्मचारी अस्पताल, मिनभवन लगिए पनि उपचारका क्रममा दिउँसो करिब १२ बजे मृत्यु भएको प्रहरीले जनाएको छ।

पाँच दिनको म्याद

जिल्ला प्रहरी परिसर काठमाडौंका अनुसार पक्राउ परेका पटेल, ठाकुर र यादवविरुद्ध ज्यानसम्बन्धी कसुरमा अनुसन्धान भइरहेको छ। उनीहरूलाई काठमाडौं जिल्ला अदालतबाट पाँच दिनको म्याद थप गरी अनुसन्धान अघि बढाइएको प्रहरीले जनाएको छ।

Originally published on abcnews.com.np.