काठमाडौं । नेपालमा विपद् तयारी उपकेन्द्र स्थापना गर्न एसियाली विपद् तयारी केन्द्र (एडीपीसी) र नेपाल सरकारबीच सोमबार सम्झौतापत्रमा हस्ताक्षर भएको छ।

परराष्ट्र मन्त्रालयमा आयोजित कार्यक्रममा परराष्ट्र सचिव अमृतबहादुर राई र गृह सचिव तथा एडीपीसी बोर्ड अफ ट्रस्टीजका अध्यक्ष राजकुमार श्रेष्ठको उपस्थितिमा सम्झौतापत्रमा हस्ताक्षर गरिएको हो।

सम्झौतापत्रमा परराष्ट्र मन्त्रालयका सहसचिव विष्णुप्रसाद गौतम र एडीपीसीका कार्यकारी निर्देशक असलम परवेजले हस्ताक्षर गरेका हुन्।

परराष्ट्र मन्त्रालयले जारी गरेको विज्ञप्तिअनुसार प्रस्तावित उपकेन्द्रले नेपालको विपद् उत्थानशीलता क्षमता अभिवृद्धि गर्नुका साथै दिगो विकासका लक्ष्यलाई थप सुदृढ बनाउन सहयोग पुग्ने अपेक्षा गरिएको छ।

विपद् व्यवस्थापनमा क्षेत्रीय सहकार्य

एसियाली विपद् तयारी केन्द्र (एडीपीसी) एक गैरनाफामूलक अन्तरसरकारी संस्था हो, जसले एसिया तथा प्रशान्त क्षेत्रका मुलुकहरूमा विपद् जोखिम न्यूनीकरण, पूर्वतयारी र विपद् व्यवस्थापन क्षमताको विकासमा सहकार्य गर्दै आएको छ।

नेपाल हाल सन् २०२५–२०२६ का लागि एडीपीसी बोर्ड अफ ट्रस्टीजको अध्यक्ष पदमा रहेको छ। यस सन्दर्भमा नेपालमा उपकेन्द्र स्थापना गर्ने सम्झौतालाई क्षेत्रीय तथा अन्तर्राष्ट्रियस्तरमा विपद् व्यवस्थापनसम्बन्धी सहकार्य विस्तार गर्ने महत्वपूर्ण कदमका रूपमा हेरिएको छ।

क्षमता अभिवृद्धिमा जोड

नेपाल सरकारले विपद् व्यवस्थापन तथा पूर्वतयारी क्षमता अभिवृद्धिका लागि विभिन्न पहल गर्दै आएको छ। सोही प्रयासअन्तर्गत एडीपीसीसँग सहकार्य गरी विपद् तयारी उपकेन्द्र स्थापना गर्ने सहमति भएको हो।

सम्झौतापत्रमार्फत नेपालले विपद् जोखिम न्यूनीकरण, पूर्वतयारी, क्षमता विकास तथा क्षेत्रीय र अन्तर्राष्ट्रिय सहयोग परिचालनका क्षेत्रमा थप सहयोग प्राप्त गर्ने अपेक्षा गरिएको छ।

Originally published on abcnews.com.np.