काठमाडौं । शिक्षा तथा खेलकुदमन्त्री सस्मित पोखरेल र नेपालका लागि स्विट्जरल्याण्डका कार्यवाहक राजदूत माथीयास मायरबीच नेपालको शिक्षा क्षेत्रमा सहकार्य विस्तार गर्ने विषयमा छलफल भएको छ।

सिंहदरबारस्थित शिक्षा मन्त्रालयमा सोमबार भएको शिष्टाचार भेटवार्तामा नेपाल–स्विट्जरल्याण्ड सम्बन्ध, शिक्षा क्षेत्रमा भइरहेको सहकार्य तथा आगामी दिनमा सहकार्य गर्न सकिने विषयमा छलफल भएको हो।

भेटमा मन्त्री पोखरेलले नेपालको शिक्षा क्षेत्रमा स्वीस सरकारले लामो समयदेखि गर्दै आएको सहयोगप्रति धन्यवाद व्यक्त गरे। उनले प्राविधिक तथा व्यावसायिक शिक्षा तथा तालिम (टिभेट) क्षेत्रको सुधारलाई सरकारले प्राथमिकतामा राखेको बताए।

मन्त्री पोखरेलले टिभेटसम्बन्धी विधेयक अहिले छलफलको क्रममा रहेको जानकारी दिँदै यस क्षेत्रमा सुशासन सुधारका लागि सबै सरोकारवालासँग निरन्तर छलफल गरेर अघि बढ्ने बताए। टिभेट क्षेत्रको व्यवस्थापन र सुशासन सुधारसँगै दक्ष जनशक्ति विकासमा समेत जोड दिइने उनको भनाइ थियो।

यसका लागि स्वीस सरकारसँग थप सहकार्य गर्न सकिने मन्त्री पोखरेलले बताए।

कार्यवाहक राजदूत मायरले नेपालको प्राविधिक शिक्षा तथा व्यावसायिक तालिम क्षेत्रमा स्विट्जरल्याण्डले लामो समयदेखि सहयोग गर्दै आएको उल्लेख गर्दै आगामी दिनमा पनि सहयोगलाई निरन्तरता दिने प्रतिबद्धता जनाए।

उनले टिभेट क्षेत्रको सुधारका लागि उद्योग र तालिम प्रदायकबीच प्रभावकारी सम्बन्ध कायम गर्नुपर्ने तथा निजी क्षेत्रको सहभागिता बढाउनुपर्नेमा जोड दिए।

नेपालको प्राविधिक तथा व्यावसायिक शिक्षासम्बन्धी नीति अन्य देशको तुलनामा राम्रो रहेको र यससम्बन्धी तथ्यांकसमेत उपलब्ध रहेकाले आगामी दिनमा थप सुधार हुनेमा आफू आशावादी रहेको राजदूत मायरले बताए।

Originally published on abcnews.com.np.