दाङ । लुम्बिनी प्रदेश सरकारले प्रदेश सभाको चालू आठौँ अधिवेशन अन्त्य गर्न प्रदेश प्रमुखसमक्ष सिफारिस गर्ने निर्णय गरेको छ।

मुख्यमन्त्री तथा मन्त्रिपरिषद्को कार्यालय, राप्ती उपत्यका देउखुरीमा मंगलबार साँझ बसेको मन्त्रिपरिषद् बैठकले प्रदेश सभाको अधिवेशन अन्त्यका लागि सिफारिस गर्ने निर्णय गरेको हो।

मुख्यमन्त्री चेतनारायण आचार्यको अध्यक्षतामा बसेको बैठकले नेपालको संविधानको धारा १८३ को उपधारा (२) बमोजिम चालू आठौँ अधिवेशन भदौ ११ गते बिहीबार राति १२ बजेदेखि अन्त्य गर्न प्रदेश प्रमुखसमक्ष सिफारिस गर्ने निर्णय गरेको सरकारका प्रवक्ता तथा सामाजिक विकासमन्त्री रामजीप्रसाद घिमिरेले जानकारी दिए।

बैठकले प्रदेशको स्थायी संगठन तथा व्यवस्थापन सर्वेक्षण गर्ने अवधि थप गर्ने निर्णयसमेत गरेको छ। प्रदेश सरकारको संगठनात्मक संरचना र व्यवस्थापनलाई थप व्यवस्थित बनाउन आवश्यक अध्ययन तथा सर्वेक्षणको अवधि बढाउने प्रस्ताव मन्त्रिपरिषद्ले स्वीकृत गरेको हो।

यसैगरी, मन्त्रिपरिषद् बैठकले नवनियुक्त मन्त्रीहरूलाई बधाई तथा सफल कार्यकालको शुभकामना दिने निर्णय पनि गरेको छ।

बैठकमा मुख्यमन्त्री आचार्यले प्रदेश सरकारको कामलाई थप प्रभावकारी बनाउन मन्त्रीहरूलाई सक्रियताका साथ जिम्मेवारी पूरा गर्न निर्देशन दिएका छन्। उनले विकास निर्माणका कामलाई गति दिन र नागरिकलाई प्रदान गरिने सेवा प्रवाहलाई चुस्त, प्रभावकारी तथा जनमुखी बनाउन मन्त्रीहरूको भूमिका महत्वपूर्ण हुने बताए।

मुख्यमन्त्री आचार्यले प्रत्येक मन्त्रालयलाई आफ्नो जिम्मेवारीअनुसार योजना तथा कार्यक्रमको प्रभावकारी कार्यान्वयनमा विशेष ध्यान दिन निर्देशनसमेत दिएका छन्।

पुनः रामजीप्रसाद घिमिरे सरकारका प्रवक्ता

मन्त्रिपरिषद् बैठकले सामाजिक विकासमन्त्री रामजीप्रसाद घिमिरेलाई लुम्बिनी प्रदेश सरकारको प्रवक्ताको जिम्मेवारी दिने निर्णय गरेको छ।

यसअघि स्वास्थ्य मन्त्रीका रूपमा कार्यरत रहँदा पनि घिमिरेले प्रदेश सरकारको प्रवक्ताको जिम्मेवारी सम्हालिसकेका थिए। सामाजिक विकास मन्त्रालयको जिम्मेवारी पाएसँगै उनलाई पुनः प्रदेश सरकारको प्रवक्ताको जिम्मेवारी दिइएको हो।

Originally published on abcnews.com.np.