काठमाडौं । कृषि, वन तथा पर्यावरणमन्त्री गीता चौधरीले वास्तविक किसानसम्म कृषि कर्जाको पहुँच विस्तार गर्नुपर्ने बताएकी छन् ।

कृषि कर्जाको वर्तमान अवस्था, सहुलियतपूर्ण कृषि कर्जा प्रवाहमा देखिएका समस्या, चुनौती तथा समाधानका उपायबारे आयोजित छलफलमा मन्त्री चौधरीले किसानले बुझ्ने सरल भाषामा वित्तीय तथा कृषि सम्बन्धी चेतना अभिवृद्धि गर्नुपर्नेमा जोड दिइन् ।

उनले कृषि क्षेत्रका आधारभूत विषयलाई सरल र किसानमैत्री ढंगले बुझाउन आवश्यक रहेको बताइन् ।

“कृषि पढेका युवालाई बैंक तथा वित्तीय संस्थामा रोजगारीको अवसर उपलब्ध गराउने व्यवस्था गर्नुपर्छ,” उनले भनिन्, “यसले कृषि क्षेत्रका जनशक्तिलाई रोजगारीसँग जोड्नुका साथै बैंकबाट कृषि कर्जा प्रवाह गर्दा कृषि क्षेत्रको वास्तविक आवश्यकता र परियोजनाको मूल्यांकन गर्न सहज हुनेछ ।”

कृषि विषयका जनशक्तिलाई बैंक तथा वित्तीय संस्थासँग जोड्दा कृषि कर्जा प्रवाह थप प्रभावकारी र व्यवस्थित बनाउन सहयोग पुग्ने उनको भनाइ थियो ।

मन्त्री चौधरीले कृषि फार्म दर्ता, कर्जा प्राप्ति तथा सहुलियतपूर्ण कर्जाको प्रक्रियामा वास्तविक किसानले सहज रूपमा लाभ लिन नसकेको गुनासो आउने गरेको बताइन् ।

समस्या पहिचान गरी समाधान खोज्न निर्देशन

मन्त्री चौधरीले कृषि कर्जा प्रवाहमा देखिएका समस्याको पहिचान गरी समाधानका उपाय खोज्न सम्बन्धित निकायलाई निर्देशन दिइन् ।

उनले वास्तविक किसानलाई कर्जा प्राप्तिका लागि सहज वातावरण बनाउनुपर्ने बताउँदै बैंक तथा वित्तीय संस्थाले कृषि क्षेत्रको आवश्यकता र किसानको वास्तविक अवस्थाका आधारमा कर्जा उपलब्ध गराउनुपर्नेमा जोड दिइन् ।

कृषि कर्जाको प्रक्रियालाई किसानमैत्री र सहज बनाउन सके मात्र सहुलियतपूर्ण कर्जाको वास्तविक लाभ लक्षित वर्गसम्म पुग्ने उनको भनाइ थियो ।

Originally published on abcnews.com.np.